診所職場事 【寶豬趣聞】要當媽了（下）｜避孕｜珍寶豬｜經一專欄

撰文：珍寶豬（funnyclinic）｜圖片：電視截圖、unsplash

小姐堅稱有食避孕藥

佢：「有交合嗰時咪食囉？食咗幾個月㗎啦！我幾個月前仲係處女！」
恭喜你呀，你而家已經唔係處女，仲已經係媽媽嚟～
醫生：「你食嘅避孕藥係咪睇醫生拎㗎？你記唔記得係咩名？」

佢摷摷手袋：「我有隨身帶住㗎！因為我哋隨時都會做，隨時都食，我哋真係有食㗎，會唔會係醫生你有問題呀？我冇可能會有咗㗎喎，我幾個月前仲係處女嚟㗎」
醫生望望佢排避孕藥：「你呢隻係要定時定候食㗎喎，你係做之前先食？」
佢：「係呀！交合之前我食一粒佢食一粒，我哋有食喎」

一人食一粒避孕藥？

點解要係你一粒佢一粒呀？你當排藥係能得利橡皮筋糖定四海魚蛋呀？
醫生：「你食嘅方法唔啱，當然冇個避孕效果，你下次食之前要睇清楚聽清楚點食先，避孕藥唔駛一齊食㗎，你定時食就得㗎啦。你要唔要我寫封轉介信俾你去健康院？」
佢：「咩健康院呀？我而家唔健康咩？我幾個月前仲係處女嚟㗎！」

…睇嚟佢受咗好大刺激，已經唔知自己想點。
我向佢解釋：「母嬰健康院啊，因為而家你有咗bb，咁如果你生bb嘅話最好都係去母嬰健康院度登記，佢會跟進埋你嘅懷孕情況」
佢：「我幾個月前仲係處女嚟㗎！我冇可能有咗㗎喎，我哋都話有食藥囉。你哋係咪個腦有事呀？」

接受唔到做媽媽嘅事實

我：「我知道你哋有食藥，不過你哋食藥嘅方法錯咗呀，正常就係你第一次食嘅就喺經期嚟嘅第一日開始食，之後就keep住日日食㗎啦，所以佢先一排有咁多粒。唔係你久唔久先食一粒咁㗎～你呢排藥應該有說明書，你有冇睇過呀？」
佢：「我有常識仲睇咩說明書？」
…事實證明你啲常識唔合格了。

我：「而家醫生寫封轉介信俾你好冇？」
佢企起身指住醫生大嗌：「你個腦有事呀！廢柴唔知我咩事冇姨媽到就屈我有咗！話我食錯藥？你哋呀，就真係食錯藥呀！我俾你哋有本事就咁樣整大我個肚，我都有本事唔要！我幾個月前仲係處女嚟㗎！」
佢講完就衝咗出門口離開診所。一時之間又真係幾難接受嘅～