地盤佬日薪$1,000    工作攞你命三千

地盤佬日薪$1,000 工作攞你命三千

啲人成日話,讀唔成書就去做地盤佬,話好似可以搵好多。係呀,係呀,好似呀嘛。喂!就算真係搵得多,都係辛苦錢。係血汗錢黎架,我再講多次,係血!汗!錢!如果咁容易個個都做到,就唔使咁難請人啦下話。

啲報紙佬呀,成日最鍾意寫我地呢啲地盤工,話咩唔使學歷,但係人工就好高。大佬,日曬雨淋,搬搬抬抬,你估我唔使出力架?唔洗做咩,我地勞動咁大有冇人講呀,下下淨係講人工高,真係吹脹。

人工高唔高就睇你點睇啦,政府講就講有千幾二千蚊一日。不過,小弟我呀,就係做個釘板學徒仔,人工都唔會過千,啲錢好多時都係去晒啲判頭到。我呢啲咁嘅低低低低層,人工就唔講啦。好多時,政府有工程會等承辦商招標啦,啫係所謂嘅大判。我想講,佢咃食水已經好深架啦。一個唔該,大判之後仲有二判,再一個唔該,之後仲有三判。嗱嗱嗱,你諗都諗到,最後份糧有幾多錢淨。

好好好,後生仔唔好下下講錢,最緊要學到嘢,係咪?係真係學到就好呀,但係喺建造業議會上嗰啲堂,淨係講釘板啦吓,根本就淨係學得少少。最無奈係咩你知唔知?就係學完之後,都唔可以自己獨立承包一個Job。你話係咪吹脹,上完一大輪都冇用。如果真係要學得識,就要睇下有冇一個師傅肯教你,肯俾你跟佢搵食。嗱,跟三幾年啦,就真係學到嘢啦。

小弟我就好低年資嘅,識得好少嘢,唔知其他係點啦,但係想搵個真正教我嘢嘅釘板師傅,真係好難。佢地好多都好驚教咗你之後,同佢掙飯食,所以根本就唔會真真正正教識你一啲好嘅釘板技術。嗱,小弟我都算好彩,師傳覺得我幫佢搵到下錢,都唔覺唔覺都有教下我嘢嘅。真係我好彩咋,見唔少明明都幾努力嘅人,因為冇人教,做極都係地盤雜工。真係好冇陰公!

唉,講到底,我哋呢行冇啲報紙佬寫到咁高人工,所謂工會出嗰啲數字睇下好啦,都唔完完全全係事實。不過都冇計啦,幾辛苦都要做架啦,唔做邊有飯開啫。