診所職場事 【寶豬趣聞】阿姐的情人節花束｜珍寶豬｜經一專欄

撰文：珍寶豬（funnyclinic）｜圖片：電視截圖、unsplash

冇情人節花束唔開心

我忍唔住問佢：「做咩咁嘅樣呀？唔舒服呀？」
佢：「今日情人節呀」
我：「所以？」
佢：「冇花收唔開心囉，仲要你哋個個都冇，一啲情人節氣氛都冇」
我：「哦～我單身冇花收好正常」
佢：「咁睇你個款你冇人要都好正常嘅」
咦？我原先係嚟關心你，點解你突然插我一刀嘅？你介唔介意俾我插返刀呀？

關心你 點知被插一刀

我：「情人節都唔一定要收花啫…」
佢：「冇花收仲邊係情人節呀，我成年都白過啦，唔得！我要做返啲嘢！」
我冇理佢，亦唔想聽佢嘅『做返啲嘢』係咩意思，我靜靜哋行返去藥房執吓藥算。

診所突然多咗幾紮花…

食完晏後，診所內多咗幾紮花…
阿姐見我哋返晒嚟，拎起紮花塞俾同事：「嗱，今日情人節呀」
佢塞咗啲花俾同事們，唯獨我冇～同事們收花後一頭霧水…
A同事問：「紮花…你送俾我哋呀？」
B同事問：「我哋有，阿豬冇嘅？」
阿姐解釋：「佢冇男朋友呀，廢事啲人一眼睇穿佢自己買花俾自己咁樣衰呀」
喂，唔該晒喎！

終於有返情人節氣氛？

阿姐再拎出幾張紙，再向同事們一人派一張：「嗱，你哋而家俾返錢我先，跟手再拎張單俾返你哋啲男朋友老公」
ABC同事即刻擘大口得個窿，呢個時候女醫生都返嚟了。

阿姐即刻拎住紮花飛奔去女醫生度，再同醫生講返同樣嘅說話。
阿姐完事後好開心咁講咗句：「終於有返啲情人節氣氛啦！你哋記住俾返錢我先呀！」
喂，唔該晒喎！