網絡平台瘋狂賺錢 真正炒老闆魷魚

社會熱話

廣告

返工要準時,收工次次OT,相信唔少打工仔都可能同小編一樣,好想劈炮唔撈,自己搞生意做老闆,做想做嘅事!

早前美國有一名男子,利用出租車手機程式Uber及民宿網站Airbnb賺錢,再加上係網上商店Amazon售賣自己設計嘅物品,收入竟然有打工三倍,於是佢幾個月前正式脫離僱員行列,全心全意利用自己專長搵真銀。

香港人出名多橋,亦都有好多專長,加上科技發達,可以靠自己腦力+勞力係網絡平台賺錢,真正「炒老闆魷魚」!以下係小編諗嘅瘋狂賺錢方法,唔知大家會唔會一試呢?

瘋狂賺錢方法

1 港孩教學班

唔少怪獸家長都希望小朋友贏在起跑線,早前有位家長為咗囝囝入讀喇沙,每星期畀對方報讀11個興趣班,結果令到佢地多才多藝,樣樣佳能!小編覺得,學埋咁多嘢唔用會好浪費,不如叫啲小朋友開網上教學班,唔洗擔心外出工作辛苦,又可以擅用自己技能撈返一筆,仲可以邊搵錢邊練習,一舉多得!

2 專業撲飛黨

香港人以排隊而聞名,上星期動漫電玩節開幕,排頭位買隻模型手J嘅陳生,用咗足足三日排隊,可謂毅力可嘉!其實佢除咗為興趣排隊,亦可以將其化身成職業,成為專業撲飛黨,網上收ORDER收顧客佣金上網掃飛,收入應該都會幾可觀!

3 忙緊分手信

有位男仔同女朋友Whatsapp,話忙緊分手信,即刻令到對方嚇一跳,原來嗰位男仔係講緊分日本買返嚟嘅手信!香港人鍾意去旅行,點解唔利用呢個好機會,買當地特有產品返嚟炒,賺到嘅錢又可以飛多轉,再買、再炒、再飛,咁就可以有藉口去多幾次旅行!

4 團購買餸APP

小編同事成日抱怨一個人煮飯,買得多餸又食唔晒,用唔哂啲食材又要丟咗佢做大嘥鬼,買得少又被菜販「瞄」,所以不如搞個團購餸菜APP,幫大家集體買餸之餘,仲有速遞服務,朝九晚五返工,大家只需講想食乜餸,返到屋企就收到食材包,只要擺落鑊煮再加調味,搞掂,健康有益慳時間又唔浪費,成日冇時間嘅上班族啱晒!