診所 醫生 護士 診所職場事 寶豬趣聞 珍寶豬 經一專欄

診所職場事【寶豬趣聞】優先|珍寶豬|經一專欄

職場

廣告

診所職場事. 經一專欄】有日一位媽媽帶個小朋友嚟到診所,佢一行埋嚟登記處就同我講:「佢哋全部都係睇醫生呀?」

撰文:珍寶豬funnyclinic)|圖片:電視截圖、unsplash

診所睇醫生想優先?

唔係呀,佢哋等緊醫生收工一齊去打邊爐啊~一唔一齊呀?
我:「係呀,你係咪登記?」
佢:「我小朋友睇呀,下一個到佢呀?」
我:「吓?唔係呀,要等啊,而家登記就排第十二~」
佢:「我嗰個小朋友嚟喎」

所以呢?
我:「係呀,我知啊,都係要照排隊啊」
佢:「小朋友抵抗力咁差,你要佢自己一個喺度承受晒所有菌呀?」
我:「或者你出去等啊?你可以隨時打電話嚟問睇到第幾個,你預返時間過嚟呀」

「禮讓」小朋友睇醫生先

佢:「出面咪一樣多菌,我嗰個小朋友嚟㗎咋」
我:「一係返屋企等呀?」
佢:「我唔係住得好近㗎咋」
我:「小姐真係唔好意思,我冇辦法俾你小朋友即刻睇先,出面個個都係咁等咁排隊」
佢:「你有冇眼睇㗎?你睇唔睇到我有個小朋友喺度㗎?我個小朋友病得幾無辜呀?」

病就個個都唔想,個個都無辜㗎啦,有邊個係鍾意病搏病呀?
我:「你去附近公園或者搵個地方冇咩人嘅坐吓先呀,差唔多到嗰陣我再打俾你啦好冇?」
佢:「唔得!我要即刻睇醫生!」
我:「真係冇得咁樣打尖㗎小姐」
佢:「呢啲唔係叫打尖,係佢哋應該要禮讓呀,你唔即刻俾我個小朋友睇先,我唔睇㗎啦,我走㗎啦」

微笑目送佢哋離開診所

哦。好呀。門口嗰邊~
我:「噢,咁真係好遺憾…今日診所都比較多人,冇辦法可以俾到小姐你即刻睇。」
佢靜一靜諗一諗:「我走?」
我抱住最誠懇嘅心:「嗯,真係唔好意思」
佢拖住小朋友擰轉身,邊離開診所邊回望我~我都將微笑送給佢咁款目送佢哋離開…
佢哋走咗之後,有個阿叔坐喺度講:「佢走遲幾步,我就忍唔住鬧佢㗎啦!」
得把口呀你~馬後炮呀你~