診所職場事 【寶豬趣聞】荷爾蒙｜珍寶豬｜經一專欄

撰文：珍寶豬（funnyclinic）｜圖片：電視截圖、Unsplash

先生嚟診所要我寫啲嘢

佢：「你同我寫啲嘢！」
我拎出文房四寶，唔好意思，我得兩寶紙同筆咋。
我：「嗯？寫啲咩呢？」
佢：「同我寫我喺公司受到上司不公平對待，情緒非常唔穩定，特許放病假一星期，欽此呀，寫英文！」
『欽此』英文係咩呀？唔好意思，係咪『YAM CHI』呀？我讀得書少唔識英文～

荷爾蒙失調 唔可以返工

我：「…你需要病假紙咁我同你登記呀，你見咗醫生先，同醫生講咗你個情況先呀，睇吓醫生認為你係咪需要放病假休息」
佢：「總之我而家荷爾蒙失調咁款啦！我唔可以返工㗎！你照寫啦！寫英文呀」
我：「我寫冇用㗎，要醫生寫先得㗎，你冷靜少少先呀，你俾身分證我登記呀」
佢：「身咩分證呀？你唔識分咩係要即刻做㗎咩」
我就係識分先叫你俾身分證我…

荷爾蒙真係唔多穩定

我：「我哋個步驟係先登記後入藥再拎藥俾錢…所以…」
佢打斷我對白，雙腳不停踏地，頭不停兩邊擰，雙手跟隨膊頭兩邊擺動：「我唔理呀呀呀呀」
…你呢個係咩動作呀，我有啲想送客呀醫生。

我：「先生你冷靜少少先呀，點都好我都係需要你嘅身分證登記先，其他嘢就入到醫生房先再同醫生講呀」
佢繼續膊頭兩邊擺動，腳又踏吓又踏吓咁向後退：「呀呀呀，連診所做阿姐都蝦我，真係激死我啦，啊呀啊呀啊」
佢一邊「啊呀啊」，一邊離開診所…嗯，啲荷爾蒙真係好似幾唔穩定～