政府要收農地起公屋？好過明日大嶼 實際過開拓棕地｜1%Anthony｜經一專欄

撰文：1%Anthony｜圖片：Unsplash、新傳媒資料室

政府轉招 收農地起公屋

朋友： 政府轉招喎，話要收番農地大量起公屋！
筆者： 啱嘅，反正五大訴求是不可能的任務，轉吓章都好。
朋友： 就算真係做到三年上樓，都平熄唔到民憤架喎。
筆者： 好過乜都唔做丫，攞得幾分得幾分嘛，哈哈！
朋友： 釋放幾百幾公頃土地，對樓價有咩影響呢？
筆者： 啱啱開始講之嘛，真係做到先算啦。
朋友： 如果真係做到呢？
筆者： 我覺得對樓市影響都唔大…
朋友： 話唔埋，可能做就更多發達機會…

收農地建公屋是好事！

收回農地建公屋，絕對是好事！據報導，現任房委會資助房屋小組主席黃遠輝表示，大型發展商擁有超過1,000公頃的新界農地，幾乎等同於明日大嶼最初的發展計劃1,100公頃土地，就算只釋放到一半，已經有500公頃，是一個驚人的數字。有多大呢？資料顯示，日出康城地盤總面積有32.68公頃，即是有十幾個日出康城咁大！日出康城有50座高樓大廈，合共提供超過25,500個住宅單位，十幾倍即是有30幾萬個單位，超過現時公屋輪候冊的總申請！係咪勁先？

比明日大嶼更正，唔需要填海！明日大嶼是一個龐大的填海工程，又要諮詢，又要撥款，工程複雜更唔在講，大吉利是講句，都唔知有冇咁長命，睇到佢完成。新界農地唔同，已經在發展商手中，只要有決心收回土地就搞掂！當然發展商亦唔會咁順攤，話收就收咩？肯定會有好多司法覆核、拗價等情況出現，難度最高的是…如果補償金額低，市民當然開心，但發展商肯定唔滿意，有排拗！如果補償金額高，發展商滿意，市民又會話你官商勾結，利益輸送！所以要及早諮詢，定下一個公開、公正、透明的機制，以快打慢，

試咗先講。比開拓棕地，更實際！棕地發展其實非常困難，一來很多涉及私人業權，不過透過收地條例應該可以拆解，最麻煩是好多時都係東一幅、西一幅，難以合併發展，難以剪裁，想起個大少少嘅屋苑都未必得。相反新界農地唔同啦，當日發展商買入土地的時候，應該已經計過度過，應該是可塑性高的土地才會買下來。

建公屋會衝擊樓市？

對樓市會否做成很大衝擊？好大影響又未必會有。首先，還有漫長的等待！現在只是提出，還要等諮詢、落實，然後還要真真正正行動，面對司法覆核，然後還要將農地變做熟地，還要規劃起樓，講吓都十年八載先見到成效，到時手上的單位都已經換了幾轉，只要睇住政策的進度，再見招拆招就可以了，如果收地好順利，就減吓磅囉。

再者，公屋與私樓是兩個不同的市場。身邊很多朋友都全心全意等公屋居屋，絕大部份都冇諗過買私樓。當然不排除輪候冊上廿多萬個申請者，有好多是有理冇理排咗先，例如身邊有朋友，一到18歲，都唔理自己有冇真正需要，工作幾年後會唔會有能力買私樓，有理冇理都排咗先，這種情況確實會影響他們買私樓的決定，不過數量應該不多。

說不定，這個政策可以創造更多創富機會。如果興建的公屋之中，居屋、綠置居的比例多，市民就有更多機會可以買到自己的物業。然後到物業升值了，或供到七七八八，就可以選擇賣出去，套取一筆可觀的資金，然後就可以換私樓，或者變出更多的資產。很多人其實知道買樓投資可以致富，只是唔夠首期又或者過唔到壓力測試，居屋綠置居就可以幫他們突破，事實上居二市場的造價亦很瘋，有些賺幅可能比私樓更高。當每個人都可以買到自己的物業，都可以賺到財富，就會更加愛惜香港，唔會隨隨便便就話攬炒了。