診所職場事【寶豬趣聞】磅重|珍寶豬|經一專欄

診所職場事【寶豬趣聞】磅重|珍寶豬|經一專欄

有日一位女士如常地嚟到診所磅重。點解用『如常』?因為佢真係日日都會嚟,磅一磅重就會走…從來都冇入過醫生房或登過記。

撰文:珍寶豬funnyclinic)|圖片:電視截圖、Unsplash

成日嚟磅重嘅女士

呢一日佢企咗喺個磅上面好耐,佢行埋嚟登記處:「喂…」
我:「嗯?咩事啊?」
佢:「你個磅壞㗎」
我行出去望望,自己企上磅:「冇呀,冇壞呀」
佢:「唔係呀,壞㗎」
我:「點解你會覺得佢係壞呀」
佢:「我個磅數大咗」
啊,重咗就賴磅壞。
我:「可能今日飲得多水啫你」
佢斜眼望我:「姑娘,你係咪講緊咸濕嘢呀?」
飲得多水又點樣係咸濕嘢呀?你會唔會諗到偏離晒軌道呀?

圖片:Unsplash
圖片:Unsplash

女士:「你個磅壞㗎!」

我:「我講緊係飲水呀,身體水份多咗磅數爭少少唔奇㗎」
佢:「我唔係肥婆唔係JUICY,我冇飲過水」

…你做咩啫。
我:「ER…我哋個磅就冇壞嘅」
佢又斜眼望住我:「你個磅壞㗎」
我:「一係你去第二度再磅呀,我哋個磅唔啱,你咪去第二度磅」
佢:「我唔可以行好遠,會生肌肉腳會粗」
我望望佢對腳…我反而覺得好似係冇肌肉地粗呢個問題嚴重啲喎?
我:「…咁一係你買個磅返屋企呀?」
佢好倔:「嘖,次次嚟親都淨係見你坐喺嗰個位,都知你冇用覺得你好廢㗎啦,我今日都算見識過,我聽日再嚟,整返好個磅呀,廢人整唔嚟,嗌人整」
佢講完之後就轉身離開診所。
醫生,我想申請將個磅搬返入醫生房!

圖片:電視截圖

 

相關文章