診所職場事【寶豬趣聞】殘花｜珍寶豬｜經一專欄

撰文：珍寶豬（funnyclinic）｜圖片：電視截圖

為咗旅行可以去到幾盡？

我：「你冷靜啲，慢慢講咩事呀」
佢：「我要提早放假呀」
咁你應該唔係搵我，係搵老細啊？
我：「放自己假？你要問返你公司喎…」
佢：「我問咗啦！我一早申請咗假唔俾改呀，但係我如果等原先個假去嘅話，啲花應該冇晒啦」
我：「我哋幫唔到你啊…」
佢：「點解呀？吓？」
我：「因為你咁樣唔係病呀，你係要拎自己嘅年假啊」
佢：「我咪講咗公司唔俾我改囉，唔係我想㗎嘛！」
我：「都冇辦法呀，醫生寫嘅病假唔係俾你去玩…」
佢：「我去到啲花都謝晒甩晒，我實病㗎喎？」

咁你到時返嚟香港就可以睇醫生拎病假啦。
我：「如果你係有唔舒服嘅就可以過嚟睇醫生嘅，不過提返你醫生寫嘅病假係會因應你病況而開，而唔係你自己揀同決定～」
佢：「我都肯俾錢去改機票啦，酒店都重新訂過，已經貴咗好多，點解你哋就唔可以體諒下我呀？我都係想去睇滿開嘅花啫，我唔係咩過份要求呀？」
咁都唔過份嘅話，我應該可以講你係九唔搭八嘅～
我：「病假唔係俾你去旅行，呢個應該係常識嚟…」
佢：「係你冇常識呀！係你冇常識呀！呀！」佢尖叫一輪…
我：「小姐，你咁樣嗌都冇用㗎，我都係幫你唔到，如果冇其他嘢嘅話我收線㗎啦～」

佢：「你去死啦，殘花！」
嘟。佢CUT咗我線～
你去睇殘花咋嘛，關我咩事～