診所職場事【寶豬趣聞】諗多咗|珍寶豬|經一專欄

診所職場事【寶豬趣聞】諗多咗|珍寶豬|經一專欄

有日一位小姐嚟到診所。佢登記後坐埋一邊等~過咗陣…佢再行埋嚟登記處問我:「姑娘,你有冇口罩呀?」

撰文:珍寶豬funnyclinic)|圖片:電視截圖

小姐好似諗多咗⋯⋯

我:「你要個口罩係咪?等等呀」
佢:「俾多幾個得唔得?」
我:「你唔係而家用咩?要咁多個嚟做咩呀?」
佢:「我膝頭都要」
我以為自己聽錯:「膝頭?」
佢點頭。
我講出嚟都覺得好低能:「你俾個膝頭戴口罩呀?」
佢又點頭。
我:「口罩喎?膝頭戴嚟做咩呀?」
佢哄埋嚟細細聲講:「嗰邊個男人係咁望住我,我唔知佢想點呀」
我望望佢所講嘅男人,唔覺有咩古怪…
我都細細聲講:「我諗冇嘢嘅,你要口罩嘅我淨係俾到一個你咋,唔可以俾得多你」
佢退後少少發脾氣:「你即係明知我就嚟俾人強姦都唔幫我啫?定係你想強姦埋我一份呀?」

…你會唔會去睇另一個專科比較好呀?
我:「我絕對冇咁嘅意思,只係口罩唔係俾你咁用…」
呢個時候,原本坐喺度嘅男人行緊嚟我哋方向。
小姐摀低身雙手掩膝頭大聲質問嗰個男人:「你做咩呀?你行埋嚟想點呀?」
我諗唔明點解個反應會咁奇怪,一遮就係去遮膝頭先~
男人指指藥房位:「…拎藥…」
確實又係我同事嗌佢埋去拎藥嘅。
於是小姐一直觀望住個男人拎藥,到個男人離開…
小姐就同我講:「佢走咗啦」
我:「嗯,係呀」
佢:「你咁就放走咗個強姦犯啦」
吓?人哋咩都冇做就係強姦犯?你會唔會離譜咗啲呀?
我:「嗰位先生都冇對你做過啲咩…」