診所職場事【寶豬趣聞】影相|珍寶豬

診所職場事【寶豬趣聞】影相|珍寶豬

有日有位小姐嚟到診所。佢行埋嚟登記處:「我之前喺度睇過一次」我:「好呀,麻煩你講我知你電話號碼或身分證號碼呀」

撰文:珍寶豬funnyclinic)|圖片:電視截圖

成功登記後,我:「登記咗啦,你可以坐低等嗌名」
佢冇行去坐低,反而企咗喺度…
我望望佢搞緊乜,淨係見到佢動作好似拎緊嘢:「小姐,可以坐低等喎」
佢:「我影少少相先」
佢抱住一隻狗仔,放到登記處枱面…
我:「小姐,你袋返好隻狗入寵物袋先呀,呢度診所唔係咁方便呀」
佢冷冷掉低一句:「驚狗唔好做人呀嘛」
…原來咁樣叫驚狗?
我:「呢度係人嘅診所,唔係動物診所啊,你要放返好佢呀,麻煩你抱返佢落嚟呀」
佢發發哋脾氣:「我影幾張相咋嘛,佢好乖㗎,得啦,你唔好企喺度啦,我唔想影到你呀,快啲行開啦」
佢對住隻狗講:「望鏡頭呀望鏡頭呀」

我冇佢咁好氣。
佢自己唔知影咗幾多張都唔成功就發脾氣:「嘖,呢度啲燈咁嘅色㗎,影出嚟咁肉酸嘅」
係呀,出去影啦嘛。
佢再講:「我仲諗好晒主題㗎嘛,諗咗好耐㗎嘛,MY GIRL AND DOCTOR」
哇,個主題真係諗得好辛苦喎,我真係唔想扼殺你嘅創意呀。
喺佢發揮緊佢個創意小宇宙時,醫生嗌佢名~
我:「小姐,可以入去見醫生啦」
佢就咁抱住隻狗仔…我嗌住佢:「小姐小姐,你袋返好隻狗仔先啦」
佢:「得啦,我隻狗好乖㗎,我仲要影相呀」
…好快,佢就俾醫生趕咗出嚟。
我聽到小姐邊鬧邊離開:「咁驚狗唔好做人呀嘛,影吓相都唔俾,咁惡!」