診所職場事【寶豬趣聞】失敗例子｜珍寶豬

撰文：珍寶豬（funnyclinic）｜圖片：電視截圖

正當佢就快行到去診所門口，佢又擰返轉身行埋嚟登記處。
佢行到埋嚟就望住我講：「我都知問你冇咩用㗎啦，不過即管問吓啦」
咁難為你又點好意思呀？
我：「你要睇醫生嘅話可以俾身分證明文件我登記」
佢：「我嚟問嘢咋」
我：「要見醫生嘅話就要登記啊」
佢：「問關於我個女啲嘢咋喎」
我係咪應該入醫生房問吓媽媽個女係咪醫生有份嘅呢？
我：「睇醫生嘅都係要登記啊，問嘢都係要登記啊」
佢一掌拍落枱面：「你耍夠我未呀？遊夠花園未呀？我都話問嘢囉！」
我覺得好冤枉啊，我明明一直都係單刀直劈叫你俾我登記呀～你做咩喺度自轉呢？你又唔係萬花筒。

我：「入醫生房先登記係必須㗎」
佢好大力嘆咗一啖氣，再手指指：「咁你同我叫醫生出嚟呀」
我冇出聲。
佢：「我淨係問佢一句啫！」
嗰句會唔會係『你愛唔愛我？你仲要唔要我哋？』，如果係嘅話，我幫你拖醫生出嚟！
我：「你想問醫生啲咩呀？」
佢：「你答我冇用㗎，你已經係一個失敗嘅例子」
吓？我？做咩燒埋我呀？
我：「你要問啲咩呀咁，我幫你睇吓你問嘅需唔需要登記先可以入醫生房問醫生啦」
佢推前佢個女：「我個女生長線好似有問題，佢其他同學仔都已經向上拉高緊，佢就打橫生嘅？」
…唔好意思，我都係一個生長線有問題嘅人，都係要登記入房問醫生啦，不過唔怕話你知，醫生都係。