2015年神州財經千奇百趣(扮)頒獎典禮

2015年神州財經千奇百趣(扮)頒獎典禮

早兩日的2015「港股之最」同大家重溫過去一年的話題股,真係要幾難忘有幾難忘,未睇既可以即時重溫:http://www.edigest.hk/Vip/detail?id=1831

今日係2015年最後一日,就搞搞意思,搞個神州(扮)頒獎禮。你知神州咁大,真係乜奇人奇事都有。小編就特別設計咗以下獎,嘉許呢啲「有潛力又有實力」的財經界公司。睇完,年頭又可以想想大計,做好準備入市囉。

樂視佛財最佳服裝獎


(圖片來源﹕網上圖片)

2015年世界實在太亂,心靈上完全得唔到愛與和平。有班人逃到網上繼續「憎人富貴厭人窮」,另一班人就投入佛學愛的抱抱。

山東濟南一間上市公司早前舉行招股會,請來一名「假.彌勒佛」到場助興。佢一手捧大元寶,一手拎咪祝福世人。睇吓佢條佛珠,有銅臭味既;仲有雙重脂味Double下巴,油水幾好噃。佢一出場,台下迷途小股民即刻瘋狂影相呃Like,而「假.彌勒佛」都好識做,大派「佛珠」助興,場面一片和諧。

短評:將佛學同財經兩個不同領域連起來,的確新奇有趣,服裝、道具都相當有「心思」呀。而且從演員的身型得知佢準備多年,為演好「假.彌勒佛」犧牲很大。

置之死地而後生海洋生物學大獎


(圖片來源﹕網上圖片)

內地上市公司獐子島於2014年總共虧損11.56億人民幣,虧損唔係高層出事,而係公司旗下74億粒扇貝一夜間死無全屍。

根據不明來歷的海洋科學家同會計師到現場進行系統調查後,指出「存貨異常的主要原因是所在海域的北黃海冷水團發生異常致使底播蝦夷扇貝遭災」,翻譯成人話,即係凍死。

不過到2015年,公司又突然話最新抽查發現啲扇貝好健康,公司當時仲停牌,打算配股集資。

有人質疑點解扇貝會死而復活,公司解釋,上年受影響扇貝主要是2011至2012年落海,而2013年下海的扇貝則不受影響。所以受災影響主要將體現在2014年度內,對公司的未來經營業績不會持續造成重大影響。

短評:公司犧牲自己業績,都要教育世人扇貝是會凍死的,仲會凍到殼都唔見埋,相當偉大。

180秒畀掌聲音效金獎


(圖片來源﹕網上圖片)

自從中央「打老虎」之後,上市公司高層被失蹤算係見怪不怪,但再次被出現的又有幾多?

復星國際(00656)董事長郭廣昌結束協助司法機關的調查後,12月出席復星2016年度工作會議。入場時,現場傳來長達兩分鐘賀佢重生的掌聲。不過,就算再多的掌聲佢都唔會自滿,為表明佢一片紅心,佢發表題為「復星組織的自我生長」演講。話復星根基在中國,未來更加植根於中國。

短評:以現場目測百多個人而言,要保持一致並動聽的掌聲非易事,而且拍手兩分鐘是會痛的。只係堅持拍掌呢個動作,都值得畀個獎。

大媽無邊界視覺衝擊大大獎


(圖片來源﹕網上圖片)

大媽真係無孔不入,估唔到連港交所(00388)都有佢哋芳蹤。金嗓子(06896)今年來港掛牌,上市當日定價4.6元,掛牌當日收4.65元,比招股價升1.09%,以每手500股計算,一手賬面賺25元。

賺幾多唔係重點,重點係敲鑼張相。上市當日,集團董事長江佩珍集優美、霸氣於一身嘅敲鑼,配合咩衫都遮掩唔住嘅少少肌肉及多多脂肪,簡直推翻一般人對美的定義。

短評:一個獎實在太少,可以的話我想畀多N個獎佢。

我想阿里做我爸爸終生成就獎

(圖片來源﹕網上圖片)

網路世界已經滿足唔到馬雲的生意慾望,嚟緊佢會殺入農村,推行「千縣萬村計劃」,希望將一分一毫賺到盡。

透過開設「農村淘寶」服務站,向唔識上網的農民銷售日用品等商品。第一個試點在江南鎮環溪村,當地人口約2,000人。每個服務站都會有個識上網的店長,幫班唔識上網的老人家網購,每次交易店主都可向阿里巴巴收取不到1%的手續費。

短評:如果佢得咗,唔單止有6億農民等住幫佢網購,全中國都有阿里的踪跡,條數真係有排計,馬雲的成就,唔攞成就獎仲有邊個值得攞?

最曲折離奇劇情獎

偷竊案成日都發生,但偷親多數係珠寶、手錶、錢、車等等等等,但有車唔偷反而偷車上文件,就真係奇聞囉。

係香港上市的中國動物保健(00940),係今個星期一(12月28日)發咗通告,話載住截至2014年底的四個財政年度的財務數據文件的卡車,係12月4日在河北省保定市清苑區,趁司機食飯時被盜,卡車係12日搵返,但車上文件就不翼而飛。

奇就奇在,呢間公司自3月30日起就已經停牌,理由係要「等待刊發2014年業績」,原因係佢預告的亮麗業績不獲核數師簽名,需要提供更多數據。而車上的文件正正就係呢啲數據,仲要係正本,正本,正本呀(因為好重要,所以要講三次)。真係苦了一班散戶,因為呢間公司唔知幾時先可以復牌。

以為呢單料爆?未算,就係中國動物保健出通告第二日,同樣正在停牌的山水水泥(00691)發通告,指公司今個月1日罷免了若干董事,並取回金鐘辦事處的控制權,但翻轉個OFFICE都搵唔到若干賬簿、記錄及重要文件,兩名執行董事已於週一向警方備案,指有關文件可能被盜或非法轉移。

故事尚未完結,今朝山水水泥又發通告,話旗下全資附屬山東山水於濟南總部,被前任董事帶同一班黑幫成員闖入,破壞公司財物及襲擊員工添。

短評:巧合呢啲橋斷通常只係出現係電影情節,除咗文件被盜之外,仲玩逼宮兼出埋黑幫,劇情仲緊湊過睇戲,想唔頒個獎畀呢兩間公司都唔得啦。

伸延閱讀:
【A股市場之千奇百趣】http://www.edigest.hk/Vip/detail?id=695