診所職場事【寶豬趣聞】咁上下｜珍寶豬

撰文：珍寶豬（funnyclinic）｜圖片：電視截圖

我隔住隻門同小姐講：「我哋收咗工啦，醫生走咗啦」
佢：「我唔係嚟睇醫生呀！」
咁你企喺門口阻住我出嚟做咩呀？要打劫嗎？啲錢俾醫生拎走晒啦喎…
我決定唔開門住，繼續隔住隻門同佢講：「咁你有咩事呀？拎報告呀？」
佢：「唔係呀，我嚟睇醫生呀」
上一分鐘你話唔係嚟睇醫生，呢一分鐘你就話係嚟睇醫生，你鬼上身得好快啊！
我：「我哋收咗工，醫生都走咗啦，聽日先有醫生喺度」
佢：「咁你又係喺入面？」
…唔好意思，我入嚟借廁所咋。
我：「我清埋垃圾就走，你聽日再嚟啦」

佢望住玻璃門上嘅應診時間，逐個逐個字讀出嚟：「（上刪N字）下午三點至八點，而家夠八點啦咩？」
我：「係呀，過咗啦，已經係八點二啦」
佢：「上次我咁上下時間嚟都有得睇嘅」
我：「上次你可能係八點前嚟到登記，醫生咪睇埋你囉」
佢：「我記得我上次都係咁上下時間嚟咋嘛，個天一樣都係咁黑呀」
請問七點五十九分同八點十分個天嘅黑度會有咩分別呀？一個叫就到八點的黑，一個叫過咗八點的黑嗎？如果係咁嘅話，你都係當我係色盲算啦。
我：「你聽日再嚟啦」
佢：「我聽日都係要咁上下時間嚟咋喎」
我：「你聽日八點前嚟到就得㗎啦」

佢：「咁上下時間嚟有得睇啦嘛？」
我：「八點前，八點前」
佢抬頭望天：「個天都一樣係咁上下啫，我上次都係咁上下時間嚟」
佢終於肯離開診所門口。
我終於收得工。