診所職場事【寶豬趣聞】抗生素另收費｜珍寶豬

撰文：珍寶豬（funnyclinic）｜圖片：電視截圖

唔肯俾抗生素嘅錢？

我：「因為你今日有抗生素，所以比平時貴咗啊」
佢：「抗生素唔係藥咩？係藥就照你寫呢個價收㗎啦」佢指住診金收費告示。
我：「我哋告示上都有句抗生素藥膏眼藥水需另外收費啊」
佢行去告示前：「邊度有寫呀，我睇唔到呀」
咁都睇唔到嘅話，我懷疑你要再入去見多次醫生，睇吓要唔要去埋眼科啊～
我：「就喺價錢下面嗰行」
佢好大聲：「哇！你寫到咁細粒字即係搏我睇唔到啫？」
有幾細呀？診金用四十八號大小字體出，句字就用三十六號大小字體出喎，都唔細呀～

我：「都好清楚啊…」
佢：「今次係你冇事先同我講明我要另外再俾錢，仲要將啲字寫到咁細搏我睇唔到，我唔覺得我係要俾囉」
我：「頭先醫生喺房入面應該都有同你講你要食抗生素呀？」
佢：「有呀！醫生有講呀，但係佢冇強調係要我俾錢囉！」
咁睇嚟最錯嘅應該係醫生？
我：「咁…如果你想唔要抗生素…」
佢搶住講：「唔係我想唔要呀你搞清楚件事，係醫生話我要食抗生素，唔係我想要定我唔想要，醫生要我食嘅我一定會食，但係醫生冇同我要俾錢，唔係我唔想要呀，醫生係要我食㗎嘛，我係需要食㗎嘛係咪？」
醫生聽到小姐拗咗咁耐似乎頂唔住，醫生行出嚟同小姐講：「今次就唔收你抗生素啦，得啦！」

小姐一臉得戚：「梗係唔收啦，你都冇強調過要收我錢！」
醫生都冇你咁好氣，縱壞晒！