一帶一路報告10個趣位

1. 鐵路的事

一帶一路報告話﹕「港鐵決定成立一間學院，專門培訓鐵路管理及營運人才，以提升本地及區域鐵路服務質素……」

一帶一路地短評﹕「港鐵主動承認服務有問題，仲咁積極投身教育界，真係好感動。睇返港鐵主動匯報嘅問題，港鐵會唔會考慮成立多一間學院，專門培訓啲車同月台幕門?望嚟望去，港鐵啲車有事多過人有事囉。Anyway，找返高鐵條數先喇。」

2. 解決爭議中心嘅中心

一帶一路報告話﹕「發展香港作為亞太區國際法律和解決爭議服務中心的工作，取得良好進展……」

一帶一路地短評﹕「香港唔止夠資格成立解決爭議中心，佢直頭係爭議嘅中心。」

3. 發展後生態保育言語偽術

一帶一路報告話﹕「……成立5億元的『農業持續發展基金』；加強支援和協助農民增值，為產品進行市場推廣及建立品牌；以及發展與農業相關的休閒和教育活動。」

一帶一路地短評﹕「其實政府都好辛苦㗎!為咗搵地起樓，忍痛割出一塊又一塊使用中嘅農地，最衰都係土地問題。不過只要錢解決到嘅問題就唔係問題，聰明嘅思歪亦深明呢點，所以大手筆咁撥出5億成立『農業持續發展基金』，大大力發展農業。小道消息話，會係古洞設立農業園，有成75至80公頃咁大把!個度本來已經好多農地啦，收完農地又撥返畀你種菜，真係皇恩浩盪呀。」

4. 一帶一路唔關本地學生事獎學金
一帶一路報告話﹕「政府會將獎學金的範圍擴展到整個『一帶一路』地區，向沿線國家推廣香港的大專教育，招募學生來港入讀學士學位課程，促進香港與沿線民眾的交往。 」

一帶一路地短評﹕「思歪呼籲商界唔好捐錢畀大學唔講；好多大學生畢業成身債唔講；大學畢業生搵唔到工做都唔講，法官大人我冇嘢講喇。」

5. 遲來的「一帶一路」辦公室

一帶一路報告話﹕「 政府將成立由我主持的『一帶一路』督導委員會，負責制定香港參與『一帶一路』的策略和政策……」

一帶一路地短評﹕「國家主席習近平早於2013年已經『一帶一路』緊，股民亦係今年初炒『一帶一路』炒到㷫烚烚，而思歪今時今日先黎『一帶一路』咁抓緊機遇，完美演繹「唔洗急最緊要快」嘅反面教材。」(詳見另文：【炒一帶一路概念 全線仆直】http://www.edigest.hk/Vip/detail?id=1937)

6. 54字真言

一帶一路報告話﹕「『扶貧委員會』正就如何改善退休保障進行公眾參與活動，凝聚社會共識。我呼籲大家積極提出意見，共同深入、知情、客觀及理性地討論。」

一帶一路地短評﹕「一份關於全港700萬人嘅全民退休保障，只係用短短54隻字就講完，足以證明政府語文水平幾咁高。」

7. 政府幫你分階級

一帶一路報告話﹕「部分中產家長擔憂離世後，有特殊需要的子女，特別是智障子女的照顧問題。」

一帶一路地短評﹕「再一次證明香港基層兒童係世界上最健康嘅兒童，識做梗係做基層；識生梗係生基層細路。」

8. 長者優先乜乜乜

一帶一路報告話﹕「政府將在現有公共設施加入更多方便長者的設計。除了按現行設計標準，在公共廁所設有防滑地面、自動感應水龍頭、扶手等，如情況許可，政府也將加設方便長者的設施，並考慮在新建的公廁提供面積較大的長者優先廁格。」

一帶一路地短評﹕「喺度宣佈，香港已經成為全球最歡迎老人家嘅城市。喺可見將來，情況許可下，香港應該會起埋長者優先飯堂、長者優先街市、長者優先籃球場、長者優先泳池。(好似係)」

9. 成功爭取乜乜乜

一帶一路報告話﹕「政府將請區議會選定合適的主要行人通道加建上蓋，預計工程可於後年展開，亦將研究應用資訊科技，增加長者及有需要人士過馬路的綠燈時間。」

一帶一路地短評﹕「政府成功爭取延長馬路綠燈時間時間呀!呢個政府實在太貼地喇，貼地到同區議員爭飯食，一眾區議員日後要醒醒定定。」

10. 目光要放遠啲

一帶一路報告話﹕「政府十分關注非法獵殺非洲象的問題，將盡快啓動立法程序，禁止大象狩獵品進出口……」

一帶一路地短評﹕「政府嘅目光受一帶一路影響，以至只見遠而不視近，遠至非洲嘅笨象真係好重要㗎。中華白海豚? 咪有5D畫紀念緊佢哋囉!」