慳時間又慳錢 輕鬆減肥4式

慳時間又慳錢 輕鬆減肥4式

明天是大年初一,新年有咁多賀年美食,蘿蔔糕、炸油角、糖冬瓜,仲有朱古力、曲奇餅等等賀年禮盒,咁食想唔肥都難。

但過年又要忙住拜年,邊有時間做運動減番,其實唔想經過呢幾日假期後身型發福,可以考慮以下做法,減肥之餘,仲可以幫你慳唔少錢添。

搶做家務

新年流流阿媽教落,唔好掃地、拖地送走財運。但都可以洗碗、抹枱、晾衫熨衫啦!唔好睇少呢幾樣好似好簡單的家務呀,其實都消耗到卡路里,仲可以練下線條,身形都出返哂嚟。大家去親戚家拜年時,可以爭住做,修身之餘,仲可以畀人覺得你乖仔乖女,之後醒多你兩封利是又點話呀。

(以下消耗卡路里為每10分鐘計)

洗碗:最緊要講求手腕同手指靈活程度,可以趁機練下手腕柔軟度,等雙手唔駛硬綁綁。
消耗卡路里:22

抹枱:要俯身展開雙臂,俯身時可以練腰力,舒展條腰。抹時盡量展開雙臂,可以拉下膊頭筋骨。
消耗卡路里:25

晾衫:烏低身再企直,可以操大腿肌肉,亦令臀部線條更加緊緻,唔洗跳鄭多燕,洗多幾機衫就得架啦!
消耗卡路里:20

熨衫:熨斗都有一定重量,當你反覆來回熨,就可以鍛鍊雙臂肌肉(至少單臂,你都可以訓練下另一隻手,不過睇住呀!好危險架!),令佢結實啲,男人可以慳返做gym錢!
消耗卡路里:20

行去親朋戚友屋企

拜年要周圍去,車費開支都唔少。其實如果親戚屋企唔太遠,只係幾個地鐵站,可以考慮行路,長途就可以搭少幾個站,早啲落車,或者唔搭駁腳的交通工具。去到親戚屋企樓下,就可以選擇行樓梯,消脂又可以鍛鍊大腿肌肉,又可以慳車費。

行路消耗卡路里:中速 40 / 半小時
行樓梯消耗卡路里:141 / 半小時

提議玩wii sports或放狗

過年除咗去親戚朋友屋企,亦少不免會有親戚上你屋企拜年,如果你屋企有一部wii或有隻狗,就可以提議一齊玩或一齊放狗。一來可以破冰搞氣氛,二來又唔洗畀三姑六婆追問你幾時結婚、生仔等等唔想答的尷尬問題,最重要就係減肥效果真係唔差,玩wii sports要四肢全身郁動,放狗亦要陪狗狗跑步,隨時玩完成身散哂。

放狗消耗卡路里:130 / 半小時
玩wii sports消耗卡路里:200(打擊) 150(網球) / 半小時

拎年貨當舉重

去人地屋企拜年,要拎唔少禮盒俾人。呢個時刻可以主動向阿媽提出扲哂所有禮盒。蛋卷曲奇啲鐵盒唔輕,一於當舉重咁練臂力!一路行一路舉,係就係怪怪地,不過可以慳返做gym時間,記住袋禮盒時,記住袋平均啲,唔好一袋重、一袋輕,到時鴛鴦臂就唔好啦。

舉重消耗卡路里:輕力度 82 / 半小時