全城關注1億六合彩 一注獨中五大貼士

今次係六合彩有史以來最高的金多寶攪珠獎金，但到時一定個個都買，好容易攤薄1億元。如果個天真係咁好畀你中頭彩，你又想一注獨中的話，就要留意以下五個發達貼士。

避開曾經中過頭獎的組合

可能你會覺得中過頭獎的組合夠旺，一於成個組合照買，咁就真係多謝你又捐錢俾馬會啦！原來據統計學顯示，曾中頭獎組合要再次中獎，要等3405年。如果你想子孫日後發達，記得將啲頭獎組合集合，世世代代傳俾後代啦。

避開生日號碼

有人都會覺得，自己來到這個世界上，令到個世界發光發亮，買親六合彩就一定買自己生日日期，以為上天會特別眷顧你……

其實，全香港好多人都有咁的諗法，所以每次開出與生日日期相關的號碼組合，都一定大把人同你瓜分獎金。生日號碼不出1至31號的範圍，即係話，買細號碼的話，一注獨中的機會相對細咗。（利申：小編試過將出生年月日加減乘除，但一粒字都唔中。）

大小號碼都要買

據分析，頭獎六個數字的總和是在110以下，即只係買1至20，例如15、16、17、18、19、20，中頭獎只係佔大約12%。而六個數字總和在190以上，即係只係買30至49，例如30、31、32、33、34、35，中頭獎只佔大約8%。

所以最好買110至190之間的總和數目，呢個組合，就要大又買啲，細又買啲，唔好側埋一面。

另外，唔講唔知，原來每期都有人買1、2、3、4、5、6這類冷門連碼博一博，如果中咗，都冇乜可能係一注獨中……

別選最冷/熱門號碼

2002至03年，六合彩增至49個號碼以來，最熱門五個號碼為10(332次)、9(326次)、49(318次)、22(317次)、6(307次)。不過咁，咁熱門的號碼，會吸引好多人跟住買，想一注獨中機會又細咗。

而最冷門號碼為19(248次)、23(254次)、44(264次)、46(264次)、3(269次)，中獎機會細啲。既然係咁，做乜仲買佢？

睇風水催運

與其計咁多數，不如搵下邊度財位多。中過四次二獎的藝人梁思浩，就教大家去一間門口做緊工程的投注站，亦有主婦在六合彩票畫兩朵梅花，咁就中咗頭獎，真係信不信由你！

另外，賽馬會資料顯示，「頭獎製造站」的中環士丹利街投注站，中過頭獎42次，次旺的有荃灣青山道、屯門市廣場及上環干諾道西投注站，各中過35次頭獎。小編從來冇係呢幾間買過，唔怪得啦……

之前本刊專欄作家龔成都有寫過篇《六合彩值博率最高的16個號碼》(
http://www.edigest.hk/Vip/detail?id=1644)，大家都可以參考參考。

不過講咁多，中六合彩機會率係1,400萬分之1，小編都係唔好諗太多，去買張電腦飛博下好過！如果真係畀小編一注獨中，呢篇應該係小編金盤洗手之作。不過都要提提你，小賭怡情，都係買個運氣，千其唔好沉迷賭博呀！