香港另類搵食「工」略  劏豬、餵雞、水手、通渠有前途?

香港另類搵食「工」略 劏豬、餵雞、水手、通渠有前途?

在大學生充斥的社會之下,以前被視為低下階層的工作,因為愈來愈少人入行,人工反而愈來愈高。三年前,美國紐約市長彭博就勸喻過,成績平平的高中學生不要浪費時間和金錢讀大學,反而當「通渠佬」會更符合經濟效益。香港都隨時變到係咁。

以前風度翩翩嘅豬肉佬,唔一定只係出現喺周星馳的戲裏。最近,僱員再培訓局的「豬肉分割員」基礎證書課程,再一次引起社會對豬肉佬的熱烈討論。


(圖片來源: 僱員再培訓局宣傳單張)

繼去年,「豬肉佬」正名為「肉類切割技術員」後,僱員再培訓局將於今年5月開辦「豬肉切肉員」及「屠宰員」基礎證書課程。完成課程後首三個月試用期月薪達13,000元,真係好過唔少剛畢業的大學生。

如果表現良好,完成試用期後員工可獲月薪達18,000元的兩年合約。據聞坊間劏豬日薪可高達1,000元,如果一個人夠勤力,日日返工,一個月隨時月入30,000元。

唔少素來講金唔講心的香港人都相當有興趣,招生日平均9.5人爭一個學額,更加有90後少女報名。

除咗肉類分割員之外,香港仲有唔少另類得嚟又搵到吓食嘅工,小編就係勞工處網頁搵到以下:

水手

你冇睇錯,香港是仲有水手的。不過依家水手的工作唔同舊時,唔洗再行船,負責船上基本維修保養就可以。

雖然月薪望唔算高,每月10,000元,但有花紅、交通津貼、勤工獎,拎晒都咪話唔和味!仲有呀,你以為一星期返足七日呀?每星期返三至四日,仲要係朝八晚六,爽~

通渠佬

以前你或者會覺得做地盤、清潔呢類工冇出色,但依家人哋分分鐘搵得多過你同我呀!

通渠佬學歷不拘,最重要係有一份守護香港的心。你知喇,依家香港的黃雨,每次都好似挪亞方舟時期咁大,冇水浸都係全靠佢哋背後默默努力的通。當然,努力係有回報,日薪600元,一星期返六日,計計吓,一個月有成14,400元呀!

飼養技術員

唔係小精靈飼養員,係雞仔飼養員呀!對小動物好有愛心,好想關心動物生活每一天的你,非常適合呢項咁高技術的工作。

由雞仔一出世,你就可以同佢哋親密接觸,鑑別佢哋係雞仔定雞女。每星期一到六,你都可以見足雞仔們10個小時,吱吱吱吱,諗起都覺得巧打耳!而且,你仲好有機會,係陪佢哋走完雞生最後一程的人,呢個咁神聖的工作,有近萬元收入。

司閽

係咪讀都唔識讀呢?閽又讀作矄,司閽即係負責官宅門房的僕人,有人叫作門丁。呢個要求學歷唔算高,職責都只係保持車道交通暢順,控制停車擺放位置。

每日工作8至8.5小時,每週工作5至6天,月薪有成12,550元,仲有年假12天、一堆福利、仲包埋食,仲有花紅!唔止個名勁,待遇都唔唔差!

相關文章