【診所職場事|寶豬趣聞】等收醫療卡|珍寶豬

【診所職場事|寶豬趣聞】等收醫療卡|珍寶豬

有日一位小姐嚟到診所,佢一嘢『啪』咗張卡喺登記處枱面~
我望望佢張卡,噢,又係尊貴嘅醫療卡,不過好對唔住,我哋唔收呢張。

撰文:珍寶豬funnyclinic)|圖片:電視截圖

診所唔收小姐張醫療卡

我:「我哋唔收呢張卡啊!」
佢:「呢張都唔收?收啲咩呀?」
我指指貼喺出面嘅醫療卡樣:「你可以望望出面張紙,印晒我哋收邊張邊隻色嘅醫療卡喺度,如果冇你嗰張嘅話,你可以打電話去返卡中心度問吓附近有邊間診所收!」
佢:「你肯定你記得晒收邊一張?」
呢啲都係從N次失敗中堆成嘅經驗啊~
我:「你呢張我哋肯定係唔收嘅!」
佢:「你打電話上去問呀,我認為係你自己唔知可以收囉,我唔走啦,出面又曬又熱,我咪喺度等到你收囉!」
你鍾意啦,你鍾意喺度等到人老珠黃都得呀,可以睇住你變老,或者成為一舊望卡石都係一件幸福嘅事啊。

我:「我打去問問唔係問題,我而家就打去呀!」
佢企喺我面前睇住聽住我打電話,當然最後都係話唔收…
我:「小姐,我哋真係唔收呢張啊!」
佢:「我係叫你打上去申請收呀!唔係問收唔收呀!」
我伸你一腳送你出門口就得。
我:「冇得即時申請~你去間收嘅診所睇會快好多喎,或者你喺度睇完我俾返收據你,你再CLAIM返?咁可唔可以呢?」
佢:「NO WAY!我喺度等到你申請到為止,本小姐大把時間!」
佢自己行去蹺埋腳坐低。
醫生睇電腦見到小姐坐咗喺出面,就問我:「係咪有症呀?」
我:「佢張醫療卡我哋唔收嘅,佢叫我哋同佢申請收喎,仲話等到肯收為止。」

醫生膊頭郁郁:「佢係客,佢點話點好啦!」
我:「即係打上去卡公司同佢搞呀?咁好似…」
醫生搶答:「佢話要等咪由佢等,你同佢講多一次唔收就得啦!」
嘻嘻~
結果小姐坐咗個半鐘嘆夠冷氣就講住粗口走咗。

診所唔收小姐張 醫療卡 珍寶豬
圖片:電視截圖

延伸閱讀:【診所職場事|寶豬趣聞】污糟嘅小姐

相關文章