財金靚女  輪界最多

財金靚女 輪界最多

昨日在中銀航空租賃(02588)的上市記招中,出現一個好省鏡的女仔。原來近期網上曾熱烈討論過佢,因為佢又係贏在起跑線,甚至引致全港葡萄pH值急跌!到底呢個女仔有咩令人咁酸?


(陳可欣facebook圖片)

嗯… 係呢張相,小編睇到係唔公平!點解… 點解個景咁靚?點解海水仲清過啲鉛水?點解五官標緻得黎仲要笑得咁甜?點解… 點解……

到底呢位係何方神聖,竟敢誤闖凡間。睇睇先,咦?又係劍橋?原來係「十優港姐」麥明詩同學,不過佢讀經濟系,做過摩根大通,依家係高盛分析員。嗯,贏左。

其實香港財金界都有唔少靚女,特別係輪場。以下五位中,有四位都係輪后。


(網上圖片)

不能不提第一代輪后李頌慈,1996年留學回港,就即刻入法興做衍生產品設計及開發,其後轉去高盛。由於當時財金界並未興用靚女SELL輪,所以李頌慈輕易彈出,佢又經常主持推廣窩輪的教育節目,所以好深得民心,輕易殿定輪后地位。亦係因為佢,以後先會有輪商挖電視台女主播過檔的風氣,你話佢影響力幾咁大,不過呢位輪后係2008年已經冇做啦。


(趙海珠facebook圖片)

頭先提過主播過檔,佢係代表之一。係咪熟口熟臉呢?就係前TVB主播趙海珠囉!珠珠離開大台之後,去過法巴做窩輪天后,又去過恒基做地產天后,但o依家無做商界女強人喇,依家身份只係DBC財經台主持、自由工作者、同埋有一子一女的好媽媽。

(林燕玲facebook圖片)

又係大台主播,呢位就係小飛俠林燕玲啦。渣打係2010年開始搞窩輪生意,唔夠一年就挖林燕玲過檔,出任股票衍生及中介銷售部認股證銷售副董事。林燕玲唔止樣玲,仲好勤力睇新聞學財經,點知好景不常,渣打舊年已經摺左個衍生工具部門,小飛俠亦無啦啦被裁。


(黃麗幗微博圖片)

呢個無理由唔記得掛?黃麗幗BB 4月離開大台之後就轉戰商界做輪后,年紀輕輕,依家職銜已經係上市公司海通國際股票衍生產品銷售助理副總裁,仲唔係絕世荀盤?但sorry喇,各位男士心動之前有一個舊聞要講多次,BB上年年尾已經封左盤了。

其實唔只輪界,按揭公司亦愛起用靚女,好似呢位靚女就係成日在財經新聞出現的經絡按揭轉介首席分析師劉圓圓,會經常同大家講解樓市同按揭息率走勢。人又靚、形象又專業,真係公司要賣廣告都唔洗搵model喇!

相關文章