陳法拉扯火 6大睇Show犯眾憎行為

撰文：JOEY

睇到小編都覺得氣憤呀！嗰啲睇SHOW嘅不快回憶又湧哂出嚟… 以下小編嚴選咗六個睇SHOW大忌，你哋又BUY唔BUY？

1. 戴高帽唔除帽
Fashion嘅嘢，小編就唔識評價喇，但係如果你過人嘅時裝觸覺影響到睇SHOW嘅觀眾，咁就要為後面嘅觀眾多多著想。有啲觀眾天生高度向燈柱進發嘅就無辦法啦，而對於真係有需要戴帽嘅人，相信你哋都唔介意轉吓帽嘅款式，例如換頂軟身偏帽咁。但堅持要戴高帽又唔肯除嘅你，就請將心比己一下喇，畢竟人哋洗幾百蚊入場係為咗睇SHOW，唔係睇你頂帽囉！

2. 傾計／講電話
大聲傾計或者講電話固然唔啱啦，但其實持續地低聲講嘢都可以好滋擾，人哋一路睇SHOW一路聽到好似昆蟲嘅嗡嗡聲，集中力較差嘅觀眾真係會好痛苦！學法拉奉勸大家，有緊要事嘅，出去場外拆掂先返入嚟啦。

3. 長開手機
人哋表演緊而你就係咁睇手機固然係唔尊重表演者，而即使你唔係度撳撳撳，淨係瘋狂開MON熄MON都會令你附近嘅人受到你嘅手機光污染，眼睛受傷之餘仲大大影響專注力同雅興。

4. 用腳頂住前面張櫈
有啲觀眾無論腳長與否，會不自覺頂住前面張櫈嚟坐，但就令到前面嘅觀眾自覺被「頂心頂肺」，渾身不自在，後面位仁兄淚動起嚟仲會大力一踢張櫈，呢一腳好容易會辣著對方！事後大家都睇到唔開心，有乜為呢？

5. 群機亂舞
自從手機有咗拍攝功能，人無論去邊都好鍾意舉機拍一拍，返工又影、食飯又影、放工又影、返到屋企都影。咁難得撲到張飛入場睇子華，鍾意影嘅你又點會放過呢個機會？但其實你一個舉機動作可以影響到好多人，呢個影完嗰個又要影，後面嘅觀眾畀你哋遮吓左邊又遮吓右邊，唔止觀眾睇得唔舒服、要照顧台下反應嘅表演者有時都會被困惑咗。

6. 譏笑投入的觀眾
好嘅演出自然能令大部分嘅觀眾投入，引發到大家唔同嘅情感，例如睇搖滾樂就緊係情緒高漲啲、睇悲劇就緊係有觀眾忍唔住飲泣、睇棟篤笑就緊係有人笑咁等等，但係偏偏有小部分唔享受個SHOW嘅人係鍾意對人哋評頭品足，聯同親朋戚友嚟望住人哋，甚至拍人片。其實你唔享受啫，點解要歧視享受個SHOW嘅觀眾呢？

除咗以上幾點外，你哋不如都分享下睇SHOW嘅經驗吖。

延伸閱讀：
【子華神《前度》金句合集】
http://www.edigest.hk/Vip/detail?id=3439
【子華棟篤笑無可取代 網民熱捧三個原因】
http://www.edigest.hk/Vip/detail?id=3442