天水圍

誰能明白我 來回要3小時車程的天水圍居民

社會熱話

廣告

如果一個「攰」字就唔去天水圍,咁,我呢世都唔洗返屋企喇!無錯,你講得好啱,來回天水圍,真係幾「攰」架。因為一出一入天水圍真係要成3粒鐘架。

我住天水圍,住天水圍最大嘅煩惱就係搭車!問十個天水圍人有十一個都係咁講!同新界西其他地區例如屯門一樣,本身搭車出市區已經耐,時間夜啲,返屋企所需嘅時間就更耐!

車費貴轉車轉到暈
我喺將軍澳返工,由天水圍去將軍澳,搭港鐵要轉3次線,單程車費要$23.5、來回就差唔多50蚊,車程最少一個半鐘頭;有時放工放凌晨1點,身心已經十分疲倦之際,仲要由將軍澳去旺角轉車返天水 圍,至少3點半先返到屋企,係咪想我哋困喺天水圍成世唔出嚟呀!

買餸貴到傻
自從天水圍三個街市,天盛苑、天耀邨、天瑞邨畀領展收咗,一個裝修完到另一個,搞到啲居民為咗買餸要走嚟走去。裝修完之後就加租加價,仲要少咗好多舖位,多咗好多連鎖店,以前嘅小店都無 晒啦,啲菜都愈來愈貴啦!

成世改壞名
多得「悲情城市」呢個名,其他人一聽到我住天水圍,第一句就會問天水圍住啲人係咪真係好慘。「悲情城市」係2006年嗰陣,當時仲係政府民政事務局常任秘書長嘅林鄭月娥形容天水圍。以前天水圍真係有好多倫常慘劇,不過,經過那些年,天水圍已經唔同咗喇,唔洗驚。講真,我都幾喜歡呢個社區。