【診所職場事|寶豬趣聞】唔想畀錢睇醫生嘅小姐|珍寶豬

【診所職場事|寶豬趣聞】唔想畀錢睇醫生嘅小姐|珍寶豬

有日一位小姐嚟到診所,佢好好笑容咁行埋嚟登記處。
佢問我:「姑娘,係咪有啲咩嘢都可以由你哋去幫我呀?」

我:「如果你要睇醫生嘅話,我幫你登記啦,係咪未睇過?麻煩你俾身份證我先呀」
佢:「唔係呀,我係需要你哋去幫我呀。」

撰文:珍寶豬funnyclinic)|圖片:電視截圖

小姐叫醫生唔好講錢

我:「我哋診所嚟,淨係有醫生睇咋喎?」
佢:「睇醫生呀?都可以咁講嘅,但係我好清楚知道自己係咩事,所以我係唔需要醫生去話我知我有咩事!」
你有咩事呀?我想登個記啫,搞咩要搞到咁複雜呢?
我:「你睇醫生嘅麻煩你俾身分證我做個登記先呀!」
佢:「我再問清楚啲先,係咪有咩啲咩嘢你哋都會幫我?」
我:「盡量啦,醫生做到嘅都會做,如果有需要嘅都可以轉介你去專科!」

佢:「你講咗呢句我就放心啦,好啦,你登記啦姑娘。」
登記後,我同佢講:「你可以坐低等嗌名。」
佢又好好笑容:「先小人後君子,我就講明先,我係冇錢俾,一陣你就唔好同我講錢啦!」
…你臉皮都幾厚喎?
我:「我哋係需要收錢,如果你冇現金嘅一係去啲收信用卡嘅診所呀?」
佢:「信用卡我都唔會俾啦!」
係咪啲咩同理心整鬼人節目呀?鏡頭喺邊呀?
我:「你係有困難所以一時俾唔到錢呀?」
佢爽快回應:「唔係呀」
我:「咁…」
佢:「我係覺得社會資源係屬於大家嘅,你哋唔應該利用社會資源去賺取唔應該賺嘅錢,呢啲係基本良心。」

…就係因為醫生聽到呢句,醫生叫我趕客,今次唔算係我趕啦~

睇醫生 收費 費用 珍寶豬
圖片:電視截圖

延伸閱讀:想預先拎定醫生紙 聖誕請病假嘅先生|珍寶豬

延伸閱讀:竹昇妹病人|珍寶豬