港家庭平均月花$27600  生活質素會係點?

港家庭平均月花$27600 生活質素會係點?

早前立法會秘書處發布了一份《香港家庭面對的財務挑戰研究》,當中提及香港家庭的每月平均開支為每住戶27,600元,比十年前大升46%,高於通脹水平。小編同你計一計,到底27,600畀到一個家庭點樣嘅生活呢?

1. 住屋

根據呢份報告,住屋佔開支最大部份,平均每住戶每月開支中的36%都奉獻咗畀間屋。

而當中住公屋同住私樓嘅住戶就係呢個開支分佈上有明顯嘅差距:公屋住戶嘅平均住屋開支佔總開支約12%,而私樓戶嘅平均住屋開支佔總開支約40.5%。如果按照平均總開支乘以36%嚟計,即係大約9,936元,如果唔係住公屋嘅話,可以租到啲咩單位呢?

根據中原地產嘅網上搵樓數字,呢個價位可以喺屯門兆康苑租到一個實用面積達434呎嘅兩房中層單位、又或者喺大埔中心租到一個實用面積達299呎嘅兩房高層單位。唔洗一萬就租到有兩間房嘅單位好似幾好,但兩個地方離市區都有啲遠,變相要加重一個家庭喺交通費方面嘅負擔。

2. 食品

香港家庭第二大開支就係食品,住屋連同食品平均佔據一住戶每月總開支嘅63%,換言之,即係食品佔27%。

我哋又以平均月支嚟計一計,即係每個月全家人只可以投放7,452元嚟醫肚,每日大約248元。

試計計,目前出街食一個碟頭飯,閒閒地都要40至50元,早餐就要30元,一個人一日三餐起碼都要120至130元。如果自己煮,依家一斤豬肉都要50至60元斤,菜都要10幾蚊斤,再加埋柴米油鹽,其實煮一餐三人份量兼有營養的飯,70至80蚊就走唔甩。

所以話,如果係兩小口子嘅家庭,以上支出或者倘可應付,但如果仲要照顧小朋友,恐怕就唔多夠營養。

如果想偶爾出街食飯,喺香港大部份嘅餐廳嚟講,可能一餐未食飽就就用哂呢一日嘅budget,呢個情況真係點睇都唔係咁理想囉。

3. 雜費及隱性開支

應付咗生活最需要嘅住屋同食品問題後,都仲有10,212元可以洗,聽落好似好唔錯?錯!因為你仲有一大堆交通費、水電煤費、電話費、稅務未交,單係這些開支,都起碼佔去3000至4000元。而仲有最重要嘅,就係一大堆隱性開支。

根據香港統計處嘅定義,隱性開支入面包括供養父母、對子女嘅教育及種種保險供款,呢筆開支多寡雖然好浮動,但為咗子女及將來,呢筆開銷的確好難慳。如果供養父母的家用要3000元,子女補習及書補雜費又要3,000元,買保險又1,000元,加加埋埋,都已經洗突。

開支升幅遠高於通脹

其實香港好多家庭都係公一份、婆一份,每人各搵萬零蚊咁,所以大家可能一直都以為一家人收入有27,600元已經算好唔錯,但睇到呢個平均開支報告,就發現唔係咁。

報告指出,因為開支升幅贏通脹幾條街,現時好多家庭都無法儲蓄,甚至長期處於「負儲蓄」狀態。有啲家庭可能會以信用卡交雜費嚟捱過糧尾,但其實只係變相借貸渡日。

秘書處喺報告提及,香港家庭嘅負債額比十年前嘅34.9萬大升85%至64.6萬,私人貸款翻升2.64倍。除咗因為生活所需越嚟越貴,亦同私人貸款越嚟越方便快捷有關。但呢一個現象又正正反映,好多收入唔差嘅家庭可能都係外強中乾,要靠借貸渡日致負債累累。

樓價係咁升,物價跟住升,公共建設又係咁加價,生活開支一年多過一年,但係人工仲保持緊係97前水平,唔好講享受中產生活,就嚟連生存都…

香港人,幾時先可以安居樂業呢?

伸延閱讀:
【想儲首期上車 每月要儲幾多?】
http://www.edigest.hk/Vip/detail?id=5843
【窮人做2.38年 先賺到有錢人一個月人工!】
http://www.edigest.hk/Vip/detail?id=5406
【明年人工料加3.5% 建造及公用事業加幅最高】
http://www.edigest.hk/Vip/detail?id=6016