長輩圖

呢類投票仲煩過 長輩圖

職場

廣告

相信大家除咗長輩圖之外,最經常收到嘅就係呢類msg…

「幫手入去條link度撳個Like,撐我個仔!比賽嚟㗎!」(馬騮遮眼x3)🙈🙈🙈

文:藍橘子

佢所指嘅「比賽」,係Facebook經常會舉行嘅爬行攝影比賽、BB最得意攝影比賽、幼兒食嘢比賽、幼兒乜乜比賽…

呢類msg,會出現喺同事、朋友、親戚Group當中。

呢班啱啱做人媽媽,母愛氾濫嘅母親,會經常不經意咁俾你睇佢個BB幅相,加句「佢好鬼衰㗎!而家學人噴口水喎!」「佢好百厭㗎,而家識奸笑~」

呢班媽媽認為,自己個仔/女係全宇宙最得意嘅生命體,仲覺得所有人都認同佢個仔/女得意。

你唔好意思唔讚佢,只能夠笑住點頭。但你呢一個微笑,喺呢班母親嘅眼中,即係「你都認同佢個仔得意」。所以,不論佢個仔做出乜嘢舉動,佢將會同你分享。

父母一定覺得自己個仔得意,呢樣我理解。

不過…唔好叫我投票支持你個仔!

呢類比賽,根本唔係鬥得意、鬥張相影得靚…

只係鬥個阿媽朋友多、親戚多、同事多…

呢種比賽贏咗,只會得到少量嬰兒用品,例如奶粉一罐或尿片一包。

為咗少少獎品而無視比賽規則,值得咩?

當然你會話「個個都係咁做,唔通真係公平競爭咩!」

其實講得幾啱…

一個簡單嘅Facebook比賽,無篩選,任何人都有權投票,一個簡單嘅普選。

但根本就無人尊重比賽規則,周圍逼啲親朋戚友,同事同學投佢一票…

呢種做法,同送包米畀阿公阿婆,再用旅遊巴送佢哋入投票站,用掌心雷投票無分別。

候選BB得唔得意,根本同個比賽嘅結果係無關,老老實實,我女朋友都經常叫我「BB」,其實我擺自己張相,都有機會贏。

正所謂孤掌難鳴,舉辦比賽嘅主辦單位,亦對呢種作弊隻眼開、隻眼閉。亦即係話,你唔作弊呃Like,係你蠢!

當好多人做一件錯事,又唔會受到懲罰。

咁呢件錯事,就會變成一件啱嘅事。

有朝一日,若果香港真係有普選,又會否出現呢種送禮物呃Like、鬥多朋友贏返嚟嘅特首呢?

 

作者為80後網絡作家,憑【我是技安,我出席了大雄的葬禮】網絡創作爆紅。
facebook專頁:https://www.facebook.com/BlueGodZi/