診所職場事 寶豬趣聞 喺殮房出返嚟嘅小姐 珍寶豬

【診所職場事|寶豬趣聞】喺殮房出返嚟嘅小姐|珍寶豬

職場

廣告

有日一位小姐嚟到診所。

佢都未行到埋嚟登記處就大聲講:「哇,咁凍嘅,殮房嚟呀?」
你又知殮房有幾凍?你喺殮房出嚟嘅?

撰文:珍寶豬funnyclinic)|圖片:電視截圖

「我啱啱至喺殮房出返嚟」

我冇理佢。
佢行到嚟登記處:「你聽唔到我嗌你熄咗個冷氣佢咩?」
原來你頭先自己同自己講嘢已經包含埋咁嘅意思~
我:「唔好意思呀小姐,我哋唔會熄冷氣呀,因為我哋都要空氣流通嘅」
佢:「凍到成間殮房咁喎,空氣都凍到變冰啦,點流通呀」
我望望診所四周,都唔見有地方結成冰喎,你係咪有幻覺呀?你係咪LET IT GO上腦呀?你個腦結霜呀!
我:「我哋診所溫度都係廿幾度啫,邊有凍到冰呢,如果你覺得凍嘅話,我或者較細少少風啦,同埋你係睇醫生嘅俾埋身分證我登記呀」

佢:「熄咗佢呀我話,凍我病點算呀?」
嚟睇醫生囉,你唔係病先嚟診所嘅咩?
我:「唔好意思,熄就一定唔會熄嘅,溫度高返啲都得,不如咁啦,你而家俾我登記咗先,快啲睇完快啲拎藥咪唔駛留喺度咁耐」
佢:「你真係有病㗎喎,凍到殮房咁都唔覺有問題」
我:「我未去過你講嘅地方,所以都唔知係有幾凍」
佢:「我啱啱至喺殮房出返嚟,我可以話你呢度同嗰度一模一樣」
你係從事相關工作嗎?我雖然好想問,但係我有啲怕個答案會嚇到我標尿。
我:「嗯,係咪睇醫生?身分證?」
佢拎出身分證:「你個人都好似喺殮房嗰啲咁呀,先要喺啲咁凍嘅殮房度㗎咋」

你不如試吓去嗰度發表你嘅偉論呀?可能死都俾你激翻生…

延伸閱讀:想要「過時」病假紙嘅先生|珍寶豬

延伸閱讀:自備儀器做大腸鏡嘅女士|珍寶豬

診所職場事 寶豬趣聞 喺殮房出返嚟嘅小姐 珍寶豬
圖片:電視截圖