【診所職場事|寶豬趣聞】一定要醫生聽電話嘅小姐|珍寶豬

【診所職場事|寶豬趣聞】一定要醫生聽電話嘅小姐|珍寶豬

電話響起~
我:「你好,乜乜診所」

對方係一位女士:「直接俾醫生聽呀」
你自己唔直接打俾醫生?

撰文:珍寶豬funnyclinic)|圖片:電視截圖

「點解唔請多個醫生返嚟聽電話?」

我:「唔好意思,呢個電話冇醫生聽㗎,你如果要同醫生講嘅可以直接嚟睇醫生」
佢:「張卡片寫住醫生名㗎喎,唔係醫生聽嘅寫個電話嚟度做咩呀?」
我:「個電話號碼都係用嚟俾你哋查詢診症時間,報告返咗未之類嘅問題」
佢:「唉我都唔知你講乜,你直接俾醫生聽得啦,唔好同我講其他啦」
我一直都係同你講緊醫生唔會聽電話呀~

我:「醫生真係唔會聽電話嘅,你要問佢嘢嘅就直接嚟登記睇醫生啦」
佢好大聲:「咁佢張卡片又寫個電話喺度?」

我都好想好大聲咁答返你「頭先咪講咗係拎嚟查詢吓啲無謂嘢囉!就係冇醫生聽呀嘛」
我:「個電話係俾病人查詢吓應診時間,幾時會休息呀,佢哋份報告返咗未嘅,呢啲嘢都係由我哋聽我哋覆,醫生係唔會聽呢個電話㗎,醫生睇症都已經好忙,唔會得閒聽電話㗎」
佢:「咁點解唔請多個醫生返嚟聽電話呀?」
…咁我咪失業囉?請個醫生返嚟聽你電話做接線生咁款會唔會太對唔住佢多年嘅寒窗苦讀呀?

我:「…醫生係診症醫人嘅,聽電話呢啲我哋處理都OK嘅,你有需要睇醫生嘅就直接嚟啦」
佢:「我拎得醫生卡片就唔係想你呢啲人聽電話啦,梗係至少都要醫生聽先對得我住㗎啦」

你個「至少」都好高成本吓喎?
我:「唔好意思,我哋真係安排唔到醫生嚟聽你電話」
佢:「咁掉得啦張醫生卡片」
嘟。
掉啦~

延伸閱讀:【診所職場事|寶豬趣聞】聽聽大便的聲音|珍寶豬

延伸閱讀:【診所職場事|寶豬趣聞】想要維他命Sample嘅小姐|珍寶豬

【診所職場事|寶豬趣聞】一定要醫生聽電話嘅小姐|珍寶豬
圖片:電視截圖