見工屢失敗  可能犯咗六大禁忌

見工屢失敗 可能犯咗六大禁忌

唔經唔覺就踏入九月,象徵住一眾莘莘學子已經失去咗寶貴嘅暑假,部分諗住享受埋最後一個暑假嘅畢業生都係時候醒覺,真係要去搵工喇!對於唔善於應付面試嘅你,不妨參考吓以下幾項見工注意事項,廢事錯失寶貴嘅工作機會吖嘛係咪先~

撰文:JOEY

無論你幾有內涵都好,畀人嘅第一印象一定係你個殼!天生嘅優缺點當然講多無謂,小編亦唔係想叫諸位去南韓大執一餐,不過有啲細節其實你好容易可以做好。

1. 儀容要整潔
例如臉上油脂分泌比較旺盛嘅你,臨出門口不妨洗返個臉或者帶定包面油紙出街;上到人哋公司之前,去附近商場廁所執一執返個樣,唔好由得自己成臉油光。男仔一定要記得剃乾淨,唔好留低你唏噓的鬚根,唔係個個面試官都好呢味嘢。

2. 留意自己嘅氣味
唔好成身汗咁上去就當然啦,另一點係唔好帶同你嘅味道上去!如果你有口氣嘅問題,面試之前就唔好食咁多濃味嘢,或者用埋口氣清新劑或香口膠等等工具;如果有體味問題,試吓帶包消毒菌嘅濕紙巾,臨上去前去廁所抹一抹個身,都可以有助改善體味。

3. 衣著同你見嘅工種符合
女生唔好太暴露,男生唔好著短褲。如果見白領工,就算唔全套西裝都最好係Smart Casual,有唔明咩叫Smart Casual嘅新鮮人,就上網google吓參考吓人哋嘅著法。不過最好都係見之前,喺人地通知你來面試嘅電話上,主動問清楚啦!

4. 遏抑自己嘅小動作
人緊張起嚟,好容易有好多小動作,其實係人之常情,但面試官就會被你嘅小動作,影響對你嘅印象,所以無論如何都要控制吓自己不自覺托眼鏡、捽手、睇錶、印印腳呢啲行為喇。

5. 帶齊資料
呢點唔洗多講啦,你帶唔帶得齊,代表你個人做事夠唔夠細心~順帶一提,最好帶定枝筆,有乜用?到時你咪知囉!

6. 唔好問唔相關嘅問題
人係有好奇心呢點相信個個都明,但係呢一點唔適合喺見工時,毫無保留咁展現出嚟!面試官幾歲、用咩粉底、住喺邊……其實都唔方同你份工有莫大關係啩?所以,收口啦施主!

最後…小編祝大家見工成功啦~!

延伸閱讀:
【打工仔1星期返3日最有效率】
http://www.edigest.hk/Vip/detail?id=4255
【內地方仗人工高 月入高達$8萬】
http://www.edigest.hk/Vip/detail?id=4301