10種方法  對付會飛入屋的蚊

10種方法 對付會飛入屋的蚊

夏天,為大地帶來蚊滋。對於惹蚊嘅朋友嚟講,夏天簡直係一段令人崩潰嘅日子。因為蚊滋,唔單止令你周身紅腫,而痛苦嘅,就係嗰種痕癢無比,但又要忍住唔好R到爆血嘅糾結之情。

不過要講到最攞命嘅,就係半夜三更萬物好夢正酣之際,一隻二隻喺你耳邊拍翼拍到你起身同佢挑機打過,結果畀佢哋搞到無教好訓。唔想咁樣?就要喺三方面都做足防蚊措施,唔好畀佢哋有機可乘!

圖片來源:Thinkstock

生活習慣

1. 食大蒜
除咗蚊香同蚊怕水,啲蚊都唔like透過人體分泌出嚟嘅大蒜味,所以可以試吓食啲大蒜嚟防蚊,如果你唔驚口臭嘅話。

2. 使用蚊怕水
用蚊怕水防蚊就個個都知啦,但你哋又知唔知其實應該噴邊度最防蚊?因為大部分蚊都係喺低處飛,所以噴喺身體較低處嘅腳腕同衣角先係最佳做法。

 

Woman applying mosquito repellent for peotection

3. 少用香水、有香味嘅護膚品、化妝品同髮膠
蚊蟲特別鍾意有香味嘅嘢,尤其是係花香。所以香水、有香味嘅護膚品、化妝品同髮膠都會惹蚊,應避免喺夏季使用。

家居衛生

4. 使用蚊香

蚊香呢樣嘢聽落好old school,但確係室內驅蚊嘅最有效方法,如果家人無氣管或呼吸道問題嘅話,不妨試試。

5. 定期檢查所有有機會積水嘅地方
積水容易滋生蚊蟲,不解釋啦。

water drain in stainless sink

6. 蓋好儲水容器
如果有啲儲水容器,就唔好就咁由佢擺喺度,因為好容易成為蚊蟲嘅產卵地,要蓋好佢哋,唔畀機會蚊蟲飛入去育成下一代。

7. 家中植物定期換水
植物無水生存唔到,所以我哋喺夏季就要積極啲換水,等蚊蟲就算產咗卵,都唔可以順利成蟲!

 

mini succulent garden in glass terrarium

外出時

8. 著淺色長袖衫褲
著住長衫褲雖然好熱,但隔咗一重就無咁易被叮到。而深色衫褲比較吸熱,體溫高嘅人都會特別惹蚊,所以著淺色衫,除咗可以無咁熱,仲無咁易成為蚊蟲嘅目標。

9. 遠離積水處
上面講過啦,積水容易滋生蚊蟲,而且積水處都會較多蚊蟲喺度出沒,如果我哋喺嗰啲地方停留就更加容易被蚊蟲叮到,所以遠離積水處就可以減低被叮機會啦!

10. 避免在叢林逗留
近年個個都鍾意親親大自然,但係大自然亦係蚊蟲嘅最佳棲息地。所以如果唔想被蚊叮,最好就唔好留喺叢林太耐喇。