80後麵包師傅 日瞓2小時做800個月餅

80後麵包師傅 日瞓2小時做800個月餅

法包、牛角酥、英式鬆餅 統統都好吃,「我都識整西式包,但我都係覺得港式包好食,同埋香港人係鍾意食港式嘅。」「四喜麵包西餅」的老闆阿康這樣說。 沒錯,很多時肚餓想咬個包,只想簡簡單單吃個菠蘿包。康師傅就是知道大家的口味,在深水埗小區老老實實開了一間舊式麵包店。小店都有出產月餅,更已做出口碑,臨近中秋訂單不絕,小規模經營唯有「揼石仔」製作:他通宵唔瞓,日做800個,為你送上一口美味!

撰文:寶(新假期 – 生活)

相:二彤(新假期 – 生活)


舖面掛有懷舊插畫作招徠。

康師傅很年輕,才27歲,已經是兩間麵包店的老闆:他與朋友阿婷拍檔,去年在深水埗南昌街開第一間麵包店,寶號「四喜」,寓意舖頭可以「四圍起」,長做長有;而最重要是夠老套,讓人一看便知賣港式包, 價錢一定大眾化,在舊區裡尤其親民。站穩了陣腳,今年中於荔枝角開了第二間。

(左)阿康
「西式包係靚,但我覺得都係港式好食啲!」
年齡:27歲
職業:麵包師傅
經驗:入行10年,兩間港式麵包小店老闆,於2016 Candia Professionnel Bakery Trophy牛角包比賽中得到銀獎。

(右)阿婷(四喜麵包西餅老闆之一)
「欣賞阿康嘅幹勁!搵佢做partner,因為覺得佢好有天份,整包學得好快。 而且佢對員工好好,我相信佢係好老闆!」

懷舊包裝 四喜月餅 包青天出動


四喜的月餅印有懷舊插畫,甚有玩味。

懷舊月餅盒請了包青天出動!

臨近中秋,店子最矚目的必定是印有懷舊插畫的月餅盒:中秋代表人物吳剛、嫦娥,還有額頭印有月亮的包青天,齊齊舉起「四」指, 做著「喜」字的口形,祝大家平安,是阿婷找插畫師朋友設計的:「純粹for fun!」其實上年的月餅盒也別具心思,印上代表月亮的Sailor Moon、水貨大媽,博港人一笑。


上年的月餅盒設計,有回應時事的拖篋大媽。

每天親手製800個 堅好食月餅

內裡裝著的奶皇月餅,全人手製,外皮香口鬆化,內餡微甜不膩,不只賣噱頭,是堅好食。做出口碑,今年訂單也多:為趕工,訪問當日阿康已有10多天只睡兩小時,凌晨3點開工,煮餡料、搓外皮、包餡、倒模,做到午夜12點,每天做到800個月餅,「逐個人手做, 步驟很多, 但廚房地方、人手有限,所以要更多時間」。而包餡料的部分,阿康堅持自己親手做,「包得唔好嘅話,倒模時就會穿㗎喇。 生意好就得啦, 最多冇得瞓啫!」


四喜手做月餅

奶皇月餅先焗熱,口感更佳!

這個時段到店子,總動員都在製作月餅, 舖面員工會幫忙用電子磅秤餡的重量,伙計們說,阿康憑目測便知是否足秤,一看到不妥便會出言責備;說罷,他們又為老闆說好話:四喜現在有兩間店,不時都要來往運送麵包,大熱天時的搬運工作,阿康都會親力親為,「完全唔係老闆要做嘅嘢」,伙計們這樣說。其實阿康曾於至少15間舖頭打工,遇過不少黑心老闆,用廉價、有損健康的材料,對員工苛刻,「當時我諗,假如有朝我做老闆, 我一定唔會咁!我覺得有錢係齊齊搵㗎」。


中秋高峰時,日產800個月餅。

做麵包辛苦 但好MAN

要搵錢,就要將生意做大,「其實我目標係開12間」,阿康說,但開分店不易,「依家只希望能做好口碑,我想客人係因為我啲包好食而嚟,唔止係順路經過而買」。


自己生意,阿康事事親力親為。

這份雄心壯志,是有10年的實戰經驗作基礎的:雖然阿康年紀輕,但早於17歲便入行,於麵包小店做學徒。他沒有從小立誓當麵包師傅的宏願,入行只有一個簡單原因:「唔讀書,就學門手藝囉。」當年學徒月薪只有4,700元,廚房又熱又焗, 但他只著眼於細小粉糰,慢慢發酵膨脹所帶來的滿足感,而將還未定性的小伙子留住的關鍵,是老師傅的架勢,「見到啲師傅好快手,覺得好型」,他憶述,「外人可能覺得好嗱喳,但我覺得好man」。

入行10年 熱情不減

專心一意學麵包,四、五年後便當師傅, 責任更大,自那時起便每天凌晨4點上班,「我覺得做麵包係好辛苦㗎」,他說,卻從沒有想過轉行, 「但我覺得挑戰好大。麵包最講求溫度,做好一個包唔難,但要做到控制品質就好難,做咗咁耐我仲係覺得麵包好吸引我!」阿康說,看到一些精緻麵包,依然很有衝勁去研究、學習。今年4月,他參加了業界牛角包比賽,花了兩個星期鑽研配方,與酒店級師傅較量,獲得銀獎,現時新舖都有售。


入行10年,阿康仍然熱情未減,不時買書鑽研手藝。

堅持做港式包:因為香港人鍾意!

其實西式麵包利潤比港式的高,他的手藝又得到肯定,但他對港式還是有份堅持,「西式包係靚,但我覺得都係港式好食啲;香港人係鍾意港式包嘅,係我入行多年嘅觀察」。而他最愛吃雞尾包,天天做包, 亦從不厭倦,「我返工時一肚餓就會食。 我做包食包㗎」。


阿康認為港人都愛吃港式包,這行絕對有得做。

$4菠蘿包,連鎖店買不到。

對麵包熱情不減,康師傅亦想傳承手藝,「但又未必個個想入行」。說時似乎有點灰心,但一邊在包月餅餡的他解釋,只是前一天又通宵做月餅,有點累;記者著他先休息一下,「唔使, 我企慣㗎, 坐著包唔夠快!」憑著刻苦與熱情, 行行都有出頭天。

四喜麵包西餅
地址:長沙灣青山道500號百美工業大廈地下B6-8號鋪
營業時間:6am-9pm
FB:四喜麵包西餅

延伸閱讀:
【月餅盒環保回收 一​次睇晒收集點】
http://www.edigest.hk/Vip/detail?id=4772