香港seven wonders

樓市

廣告

古有金字塔等七大奇蹟,香港亦毫不輸蝕,一樣有seven wonders,不過唔係七大奇蹟,而係「七大奇則」。

近年新落成的新盤,間格細不特止,圖則仲千奇百怪,間格三尖八角又有,一間屋四個廁所亦有,仲有只係容納一人的露台,要幾奇,有幾奇。今次經一大笑鳥就搵左以下七個奇則,畀大家過目。

奇則一:鑽嶺三尖八角

近日遠東發展(00035)位於黃大仙新盤鑽嶺,間格不單止三尖八角,成間屋不足200平方呎,工作平台及露台竟然佔左間屋14%,真係住的地方所淨無幾,放得張床都未必放得落衣櫃,擺放傢俬絕對要「腦筋急轉彎」。

奇則二:勝利道1號似七巧板

由永義國際(01218)發展的勝利道1號,間格之差與鑽嶺不遑多讓,同樣是不規則間格,似足七巧板。雖然單位比鑽嶺大少少,有226呎平方呎,但擺放大床同樣要考買家心思,若遷就進出廚房,就要長期關露台,真是魚與熊掌!

奇則三:嵐山劏房王

開窗即見對面屋、山墳相伴,便是長實地產(01113)位於大埔的嵐山,2期最細單位實用面積僅165平方呎,扣除廁所及廚房,其實僅剩100平方呎左右,尤如單人囚室,可謂全港「蚊王」。

奇則四:緻藍天屎塔陣

又係誠哥長地旗下傑作,於將軍澳日出康城的緻藍天驚現四房四廁,樓盤中間三個「黑廁」更堆成「屎塔陣」。除屎塔外,呢間屋仲有門陣,一間屋有13道門,岩哂玩捉迷藏。另外,儲物室面積只係得20方呎,真係唔知可以儲乜。

奇則五:DIVA特長窗台

誠哥連中三元,又係長地啦。位於北角的DIVA,則有超過16呎的特長窗台,瞓兩個姚明都仲得!

奇則六:觀月.樺峯棺材平台

市建局近年也「發功」,與信和置業(00083)合作的觀塘觀月.樺峯,每個單位均設有露台及工作平台,面積分別為22及16方呎,兩者都係又長又窄,僅能容一人,十足「棺材」。有三房單位的睡房,面積僅得50方呎,真係床都未必放得落。

奇則七:加多利峰超迷你工人廁

最後一個就是大鴻輝旗下的旺角樓盤加多利峰,一入門口就「出事」,入客廳之前要「飄移轉彎」,事關入左門口之後要轉彎先入到廳,但走廊闊度就得39吋,傢俬稍為大件都未必入到去。另外,最為奇特就係超迷你工人廁,細到不得了,入去方便都要左閃右避,坐落馬桶更被洗水盆「頂腳」,真係去廁所都唔安落!

太古城上月最新放盤叫價是多少?

太古城上月最新放盤叫價大約…各區樓市買賣詳情請看

九龍區有哪些大型屋苑放盤呎價最低?

九龍區不少受歡迎的大型屋苑呎價對比上月都有回落…各區樓市買賣詳情請看