有冇人覺得去銀行永遠要排好耐隊

點解你地扣我手續費？

點解你地無老人家專窗？

點解你地食我張卡？

點解你地D打簿機又壞？

點解你地凍結我個戶口？

點解你地話我密碼唔啱？

點解你地要我等咁耐？

點解你地依家做嘢咁慢咁無效率？

點解明明寫提存服務你地又做文件嘢幫人填文件？

點解你地咁多點解？

資源問題，邊個想？ 邊個唔想日日齊人手開工，大家唔駛做到水都無時間飲、一日都去唔到幾次廁所？但人手出盡，係咁多就係咁多，好多時食無定時，有同事要早餐時間十一點食午飯之後直落到五點關門。一係就兩點幾三點過晒食飯時間先食午飯，一個接一個客咁接無一秒停過。其實我地都好多嘢做好忙，唔係9點開門就9點番，5點關門就5點走嘅。開門關門請埋數，埋完請完成文件工作先好走。 點解覺得職員們好得閒？

其實同事們都係普通人，要秒速反應知你地想做咩絕不是易事，畢竟銀行職員唔係你肚入面條蟲，當職員嘗試幫你解決，請唔好一句撻埋嚟”點解你地咁都唔識？” 請係講呢句話前確定自已知道自已想做咩先。 不停loop 要重設密碼，重設密碼請稍移玉步去ATM，櫃枱只能重發密碼。 ”

又，等得耐9成唔係因為手腳慢，而係因為工序守則日漸增加，開户口解凍户口真係唔係㩒一個enter 就做完，係要時間去做，點解客人唔可以行多一步，每年用一用個户口，做一次提款防止凍結，就係呢一分鐘可以唔駛以後排一個鐘去解凍户口，點解就唔可以？自已令自已要排隊咁又可以怪邊個呢？

老婆餅無老婆，菠蘿包無菠蘿真係小學雞都知。提存服務就梗係唔止提存啦，一間啲行十幾個櫃枱唔通每個都係只能提存？ 其實「提存服務」係提存+服務 ，除咗提存仲有提供一般銀行業務，你話點會無文件嘢先得嘅呢？

有時真係將心比心，以禮待人唔係職員單向，客人一句唔該一句辛苦晒真係令人甜入心，覺得幫你做完嘢都係抵嘅。下次見到你都開心D醒神D，畢竟職員都係人，你都唔想自已做完嘢仲要比老板上司方向面你啦，係咪？

最後，其實銀行職員都只係高辛一族月入過慢的朋友而已 。

文章授權：90後銀行小妹甩轆記

作者簡介：溫柔，九十後銀行前線女職員，

幻想自己是銀行家，現實上為跑數妹。

上至銷售投資理財保險產品，下至開戶申請貸款信用卡，

全部一手包辦。

畢業於四大商科，高不成低不就，終日銷售，

為一萬幾千折腰。

於 2016 年開設 Facebook Page「90 後銀行小妹甩轆記」，

分享每日在分行上演的奇趣事、遇見的瘋狂客戶和職場點滴，

引起不少讀者共鳴。

作者今年剛推出新書《銀行小妹甩轆日記》
新書簡介：
★ 90後銀行職員瘋狂洩密，甜酸苦辣，一書包辦！
★ 60篇銀行前線滑稽實錄！
★ 無論身家一百蚊定一百億，出世開始就避唔開理財！

【同行、客戶均有共鳴！】
存款、投資、借貸、定期⋯⋯升跌賺蝕！梗關你事！

◎瘋狂客戶特輯
－非VIP都可以排Premier條隊？
－用JM Tone開戶口會著數啲？
－分行有《奪命金》真人版上演？

◎職場甩轆日常
－Banker原來只係Sell禮品？
－「開戶三寶」係邊三寶？
－情侶開聯名戶口有詛咒？

◎銀行前線二三事

－銀行職員唔同崗位有乜分別？
－想投身「銀行孽」有冇捷徑？

◎節日限定合集
－銀行掛曆利是封免費任攞？
－生日可享Premium服務？