**轉載自[慘慘豬]分享**

有時唔只係客，有啲豬一樣嘅同事都好難頂。

話說以前喺某中資銀行做CS, 有個客埋來問：「點解張信用卡無啦啦扣咗6千幾蚊㗎？！」，咁我就幫佢打去card centre 問，原來佢張信用卡揀咗80,000蚊免息分期做迎新禮品，分12期還，所以就扣咗佢6千幾蚊。

同個客係咁解釋，佢話「話明係迎新禮品，唔係送㗎咩？」大佬，銀行又點會無啦啦俾80,000蚊你啦。重覆解釋咗10分鐘，唔知佢明定唔明，終於肯走。

點知佢去到分行門口就同個保安講話佢無啦啦俾人扣咗6000蚊，個保安就話：「咁唔啱喎，你問下嗰邊啲人啦 (指住我)！」之後個客又纏住我，又再重覆同一番說話10分鐘，真係不怕神一般的對手，就怕豬一樣的隊友。

一山不能藏二虎? 辦公室兩個阿姐相爭

有人的地方，便有競爭。有兩個女人的地方，註定永無寧日。

曾幾何時，分行只有一位阿姐級人馬——Connie姐。她是老臣子，有好多熟客都只點名找她，不認其他職員。她照顧熟客是照顧得好，但就比較揀客，而且絕少接生客。同時，對老闆的指令她也視乎心情而辦。

日子久了，老闆希望開拓多些客源，順便制衡一下現有局面，就重金禮聘娜姐，不，當時還是娜妹的另一名客戶經理回來。起初，娜姐還未站站穩陣腳，處處忍讓。不過，人的忍耐力始終有限，娜姐第一次與Connie姐開火是在某個夏天。

導火線是曾引發不少古今中外辦公室矛盾的千古罪人——冷氣機。

事源當時Connie姐房間的冷氣機壞了，待修，而剛來沒多久的娜姐尚未有房，暫時坐在Connie姐房外的位置。盛夏，房間悶熱，Connie姐理所當然地校大外面的冷氣。而娜姐一向穿著較清涼吸睛，覺得凍極，走去把冷氣調低。

於是，一個覺得熱，調高；一個覺得凍，調低。幾個回合之後，Connie姐終於率先發火：
「喂，你做咩成日校部冷氣啊！」

娜姐不甘示弱：「我覺得好凍啊！咪校高啲！」

「我間房好熱，好焗！你凍你唔識著衫？」

「你熱都可以除咗件外套㗎！」

「我要見客㗎！Dress code，Okay？啲人成日著咁少都唔知博咩！」

「嘭！」緊接著是Connie姐嘭門的聲音。娜姐於這個回合敗陣，因為無門可嘭，只好咬牙忍冷。

男人多數認為這是女人間小家子氣，不明白女人為何因一部冷氣機可以霎氣一整天，道理其實簡單易明——宣示主權。女人的控制欲可以很強，強到連一個冷氣掣也屬管轄範圍。

俗語說「一山不能藏二虎」，更何況是兩隻老虎乸。我記得有一次與老闆共進午餐，談及同事相處，小妹言語間顯露出「既生Connie姐，何生娜姐」的疑惑，老闆微笑，問我，「你嘅鰻魚好唔好食？」

我含著滿口鰻魚飯，茫茫然點點頭，但心諗點解咁九唔搭八，佢哋同鰻魚有咩關係？

「有無聽過Catfish Effect?」我搖搖頭。

「以前日本有條漁村盛產鰻魚，但好多時，啲鰻魚撈咗上嚟之後，唔夠半日就會死晒。有個漁夫發現咗一個方法，可以令鰻魚保持生猛，就係放幾條叫狗魚嘅雜魚入去。鰻魚同狗魚天生係死對頭，呢啲狗魚周圍亂游，好有威脅性，而鰻魚為咗避開佢哋，亦努力郁動，反而仲無咁易死。」

嗯，唔怪之得鰻魚咁好食。不過做鰻魚真係辛苦，好彩我負責食啫。其實兩位阿姐之間鬥爭又與我何干，倒不如食多一碗鰻魚飯！

「老闆，啲鰻魚飯好好食，我可唔可以叫多一碗？」

最近分行盛傳因為娜姐表現突出，會連升兩個Grade，即是比Connie姐還要高一格，成為最大阿姐。

雖然兩人對外稱謂都是高級客戶經理，但其實每個稱謂背後都有一個Range的Grading。而原本娜姐比Connie姐低一格，是次升職後，將會反超前，lead返Connie姐轉頭。

花無百日紅，難道Connie姐母儀分行的時代將要結束？娜姐終於吐氣揚眉，反勝Connie姐一局？

平時睇得多宮廷鬥爭戲，知道在位者要被扯落嚟，邊有咁簡單。

小妹雖八卦，但都有道德操守，絕不會偷聽別人對話。但因為趕住搵老闆簽名，我去到老闆房門口，在不小心非自願盲中中情況下聽到呢段對話。

「其實係咪因為佢？」娜姐好激動好大聲。

「一嚟主要係頭先講嘅，上面批唔到咁多quota；二嚟希望你明白，你哋都係我嘅得力助手，缺一不可。你都知佢喺度做咗好多年，如果以升職速度計，你比佢快好多。我都唔想呃你，佢最近向我遞信，希望可以升職。始終佢做咗咁多年，有好多熟客，我都會挽留佢。」

「我覺得好唔fair。」

「我知道你係叻女，好做得嘢，你嚟咗咁短時間，做出咁好嘅成績，你嘅能力，大家有目共睹。升多一級，只係時間問題。今次係特別事件，我保證，喺下次Appraisal，我會盡力寫好，同上面講升返你。」

「……」

「You have my word.」

我宜家先知，原來老闆唔單止湊客叻，就連氹女人都有一手，「師奶殺手」果然名不虛傳。

原本以為娜姐會反敗為勝？Sorry，職場上從來沒有Happy Ending，只有兵不厭詐。

呢件事發生之後，娜姐請了兩日sick leave，而Connie姐則很風騷地請同事們食Tea，以慶祝自己升職。大家都很譁然，不知道箇中原因，紛紛慨嘆職場上一分耕耘，卻沒保證收穫。

我咬著Connie姐請的炸雞肶，牙骹幸好未軟，一邊想起老闆講述的鰻魚故事，也許，這次換娜姐成為鰻魚，越戰越勇，未嘗不是一件好事。

兩個女人之間的鬥爭仍會一直延續落去，姑且睇下邊個可以笑到最後。

Anyway，我係笑住食炸肶嘅。

好開心大部份人都想happy ending——即是揀「打和！」。可惜，我寫嘅唔係老作，而係現實，結果只有一個——必有一傷。不過出乎預料，我以為二揀一之中，大部份人會揀「娜姐」，因為，原本佢先係贏家。

文章授權：90後銀行小妹甩轆記

作者簡介：溫柔，九十後銀行前線女職員，幻想自己是銀行家，現實上為跑數妹。

上至銷售投資理財保險產品，下至開戶申請貸款信用卡，

全部一手包辦。

畢業於四大商科，高不成低不就，終日銷售，

為一萬幾千折腰。

於 2016 年開設 Facebook Page「90 後銀行小妹甩轆記」，

分享每日在分行上演的奇趣事、遇見的瘋狂客戶和職場點滴，

引起不少讀者共鳴。

作者今年剛推出新書《銀行小妹甩轆日記》
新書簡介：
★ 90後銀行職員瘋狂洩密，甜酸苦辣，一書包辦！
★ 60篇銀行前線滑稽實錄！
★ 無論身家一百蚊定一百億，出世開始就避唔開理財！

【同行、客戶均有共鳴！】
存款、投資、借貸、定期⋯⋯升跌賺蝕！梗關你事！

◎瘋狂客戶特輯
－非VIP都可以排Premier條隊？
－用JM Tone開戶口會著數啲？
－分行有《奪命金》真人版上演？

◎職場甩轆日常
－Banker原來只係Sell禮品？
－「開戶三寶」係邊三寶？
－情侶開聯名戶口有詛咒？

◎銀行前線二三事

－銀行職員唔同崗位有乜分別？
－想投身「銀行孽」有冇捷徑？

◎節日限定合集
－銀行掛曆利是封免費任攞？
－生日可享Premium服務？