付出汗水生活健康 返2放10地獄更

付出汗水生活健康 返2放10地獄更

文章授權:我的你的紅的

凌晨點零鐘嘅九龍灣工廈區,就好似死城咁,除咗偶爾路過嘅的士,都無咩其他人類活動,而我咁啱就係其中一部路過嘅的士。

忽然一個白背心猛男喺橫街衝出,上下搖其手,佢渴求的士我渴求乘客,無須考慮馬上停車。驚喜嘅係,上車嘅唔係嗰位猛男,而係一個相對而言細細粒嘅女仔,去相當遠嘅梨木樹,車程遠燈位少,我真係喜出望車外。
落旗就開車,「返呢邊咁夜收工,真係要搵個猛男陪一陪。」我隨意搵啲嘢講吓。「係呀,你知啦,九龍灣呢邊都有啲風化案,有人陪住落黎安全啲嘅。」九龍灣女子高危?呢句說話我喺個幾兩個鐘之前先聽完,接下來嘅對話都無乜可觀性,都係講返香港治安有幾差,疑犯係咪死咗就等於破咗案,最有力保護自己嘅人就係自己等等。

當我問到係咪平時都收咁夜時,乘客表示:「唔係啦!日日都係咁點做?係久唔久要OT啫。」

「係?咁你正常放幾點㗎?」
「我哋公司分早中晚三更嘅,正常就二至十啦。」
「二至十?」輪到我驚呼,「咁真係無家庭無愛情個喎。」
「無計,都習慣咗,我返工前啲朋友已經返咗工,放得工黎都夜,無理由要人哋等我等咁夜嘅。 」
「咁你有無朋友㗎?」
「有,真心FRIEND幾個囉,總就到時間見面嘅,如果有心約。」
又係嘅,就算唔係返中更,我哋都好少見到朋友啦。
「諗諗下,中更都好丫,可以訓到夠先起身,返工又唔使同人迫車。」邊揸車邊思索,我又諗到另一個可能性。
「呢個都係佢個好處黎,我都仲適應緊。」
「適應緊?唔係每幾個月調一次㗎?」(我諗返開固定更嘅讀者,睇到呢度實恥笑我)

「唔係啦,返咗中更就永遠都返中更㗎喇。」
「哈哈,見工嗰陣有無諗過返中更,會係咁樣嘅生活?」
「邊諗到咁遠,有工做就做住先,做做吓都慣嘅。」
「係咪見工嗰陣就乜都制,返工嗰陣就跟機制?」
「哈哈,係呀,可以咁講。」
無論咩工都好,親身返工前同隔住個mon估嘅感覺,真係好唔同,唔試過,齋聽人講,始終都無體會。正如揸的士咁,喺討論區睇啲師兄點SHOW錶頭,聽人講唔同型嘅腳法,又點及得上親身走一轉咁實際。面對同樣嘅工作,唔同人唔同機遇,結果亦都大不相同。呢位小姐滿足於中更嘅生活,唔代表適合你同我。
再傾落去,原來夜更人工最高,但係工作量就相對較少;早中更就差唔多,但返工期間基本上無蛇王嘅空間,無嘅,早更付出汗水,中更付出生活,夜更付出健康,睇你點揀啫。落低乘客之後再就直出尖沙咀,諗深一層,除咗佢地物流業係咁,香港都好多行業係返中更時段,各大商店、食肆、報館,周圍都係喺你收咗工,先係佢哋最繁忙嘅時間。之前以為返中更幾難有正常生活,不過既然唔少人都係咁樣過生活,咁睇黎返唔同更次未必無生活嘅,唔同啲啫,你同我身邊,都有唔少中更朋友、另一半啦,係咪?

掛住諗,幾乎中咗葵涌道例位相機,好彩有部四環急停,呢個時候真係要多謝佢盞尾燈太刺眼,唔係隨時無三分。

關鍵詞
地獄更