你公司有冇 7種窩心好同事+4種麻煩同事

撰文：AVIS LAU（原文：New Monday）

以下留言節錄於Facebook，Office充滿衰同事是常識吧，所以遇上好同事就要好好珍惜呀～

「最慘係本來以為係好同事，原來都係你背後講是講非，挑撥離間，再巴結上司一齊攻擊你！」

「好同事多數被衰人迫走/夠期調走/退休….，得番d衰嘅同事賴死唔走」

「唔期望有好同事 只希望D同事唔好搞自己 就足夠」

「公司有條肥X係會計，又懶又擦鞋，個個都叫老細 ，轉行出來做，貼錢都無人要」

「知人口面不知心，要慎防。」

「容我感性一下，你真係難得由同事變好朋友既人，想當年拎CL去唱k的日子」

1.放工肯出來食飯睇戲行山

如果你們的關係能從純粹同事變成能相約看電影的朋友，證明你們關係也不錯。

2.肯同你講真話

跟普通同事的對話，就僅僅是圍繞工作，或是那些「你對鞋好靚喎，係邊度買㗎？」等冇內容話題。只有真心當你朋友的同事，會誠實跟你講心底話。

3.「喂一齊食飯囉～」

別小看這句說話，其實聽到呢句說話嗰句人，係會好窩心。

4. 買咖啡、零食一定預埋你

而且清楚你喜歡邊一款薯片、朱古力；飲開邊種啡，加幾多糖都有晒默契。

5. 幫你分擔工作

有時同事問：「你走得未，一齊行啦！」你話：「仲爭啲手尾呀。」這個時候他/她便會暖暖拋出一句：「爭咩呀？一齊幫你整埋啦。」

6. 在你忙到發癲或受委屈時叫你保持冷靜

當然都同會同你一齊鬧爆衰同事/上司/高層/客戶…… 喺你頂住條氣嘅時候，好同事就係令你開心返的靈丹妙藥。

7. 只要有他們，公司也沒那麼糟

每日要留喺公司咁長時間，如果冇咗一班好同事，10個8個鐘，點捱到放工呀～？

人生必然經歷過不斷轉唔同工種,不斷轉公司。但若干年後,你覺得塵世間已無嘢值得留戀,於是你放棄尋尋覓覓,留喺一間公司奴役終老…

因為你覺悟到,無論轉幾多份工,你始終都唔會鍾意返工。

喺你腦海入面,共同為目標奮鬥,上下一心去解決問題,努力付出係有回報嘅公司,只係一個現實唔存在嘅烏托邦…

當我轉咗好多份工之後,仲發現到一樣野,就係每一個辦公室都擁有一群相約行為怪異嘅同事…情況就彷如象棋都一定有兩隻炮兩隻車。

一) 『你老母係咩時辰生你出黎?』

老實講!真係有同事問過我呢個問題…呢類同事對你嘅年齡、住址、家事、私事,甚至乎星座都極濃厚興趣,由你入職開始,就好似查家宅咁「住邊頭啊?幾歲?搭咩車返工?有冇女朋友?」簡直煩過你老母。

然而,你永遠無法猜度佢知黎做乜,因為佢可能連自己都唔知問黎有乜用,但佢就總係不停打聽你嘅私人生活,然後作出評價,或者留返食飯Dead air時扔出黎作為話題。

二) 『一齊聽接駁鈴聲』

工作上同其他公司溝通就少不免,尤其係大公司,撳幾十個制,等一輪都未駁到真人聽電話。而有一種同事,就好似要話畀全世界人聽。

佢打緊電話咁,開到speaker好似HiFi咁,佢自己就行到老遠部影印機print野,難為坐佢隔離嘅同事就一直被噪音騷擾,普通鈴聲都算數,最煩嘅就係對方電話有接駁鈴聲。

三)『影印機洗牌法』

我明白撳完個Print制嗰種心急嘅心情,亦明白見到影印機出極都唔係自己野嗰種無奈。

但有啲野唔屬於你就唔屬於你,點急都無用。當你順序咁print一大疊開會用嘅文件出黎,當然係想順返次序拎埋位。

但呢位性急同事就幫你幾張幾張抽出黎,又唔排返次序,到最後你就好似玩襟棉胎輸咗咁,將一疊亂晒次序嘅文件疊齊返埋位重新排好次序。

而最令人氣憤嘅係,佢仲用一副怪責嘅口吻同你講:「下次Print咁多張出聲嘛…」

四)『洗碗定煲粥啊請問?』

每當飯後時間,Pentry一定堆滿同事,有人要斟水,有人要洗飯盒,有人等埋魂魄返齊肉身先繼續工作。

總有一部分同事,好鍾意喺Pentry傾計,一傾就無停口,最幣係佢一邊洗飯盒一路傾,或者企喺個斟水機面前傾。

喂大佬啊!你哋同公司,咁多話題咪放工傾飽佢囉!我想飲啖水啫!最慘係,當你行埋去講聲「唔該借借」嘅時候,佢哋就會驚死你偷聽佢講嘢咁,即時靜晒,等你行開咗先繼續傾,咁神秘入廁所傾啦不如。

公司係一個大家庭,但同事唔可以好似兄弟姊妹咁對待,唔可以隨便出聲,但呢種「少少事」每一刻都不斷累積,就會變成你壓力嘅最大來源。

放鬆啲?準時放工我咪放鬆囉!

延伸閱讀：
【研究顯示，離職原因最高比率是「辦公室政治」】
http://www.edigest.hk/Vip/detail?id=8409
【公司總有個專反駁別人意見 又毫無建設性的同事】
http://www.edigest.hk/Vip/detail?id=8250
【每間公司，都總有一個受老闆賞識嘅擦鞋仔】
http://www.edigest.hk/Vip/detail?id=8103