為咗一層樓 我哋仲要犧牲幾多嘢

社會熱話

廣告

為咗一層樓 我哋仲要犧牲幾多嘢

想信大家後生果陣,一定有諗過到十八歲成年果年,要做啲咩特別嘅嘢慶祝一番?可能係落酒吧瘋狂一夜,馬上去搵師傅學車等等,但喺香港,唔少後生仔會做嘅事係第一時間去申請排公屋

眾所周知,單人後生仔排公屋要接近400幾分,簡單啲講即係分分鐘排成30年或以上,所以唔少人會同兄弟姊妹一齊排,為咗過到入息審查,更不惜做低收入/現金出糧嘅工作。不過人總有自私嘅存在,坊間都不時傳出一家人為咗層樓反目成仇嘅事件,近來網上討論區就有一個活生生嘅例子,內容大致如下:

兩兄弟成功排到公屋上車,但阿哥當時就結咗婚,於是做細嘅都大方讓咗間堅比阿哥佢地夫婦住,而阿哥都應承將來有小朋友就會買樓搬走!

點知阿哥最後偷偷地申請綠表,用公屋換咗層居屋同老婆嘆世界,難為細佬依家自己排公屋又過入息。最重要係浪費時間之餘更被自己親人利用,引來一大班網民為佢抱不平。

其實除咗上述例子,傳統家庭觀都令唔少兄妹/姐弟反目!女大當嫁,可以跟老公係唔少父母嘅諗法。由於好多父母只能負擔到買一層樓,好多時都會留俾男丁!不過唔係個個女性都只係會釣金龜,呢種行為對佢地嚟講係極度唔公平,為咗層樓,我哋失去金錢、親情、時間,真係值得咩?

當然大家都可以話佢哋本身可能就冇乜感情,無論層樓買俾邊個,兄弟姊妹間都可以彼此照顧扶持,但同時亦都證明咗「樓」係香港嘅價值高到有人認為可以凌駕於「親情」,香港人到底仲要為一層樓失去幾多嘢,我實在已經睇唔透。