空姐面試攻略!唔係你想像中咁簡單Part3

空姐面試攻略!唔係你想像中咁簡單Part3

上回空姐面試攻略 Part 2 Jennfier講到英文筆試同第一輪面試嘅注意事項,究竟排除萬難去到最後一關Final Interview時又要注意啲乜呢?

想知Final Interview當日由踏入航空公司門口嗰一剎那所有要注意嘅細節同秘密係乜,同埋考官到底問咗Jennifer咩問題? 一齊睇睇Jennifer點講喇!

去到Final Interview當日,Jennifer去到航空公司一間房做登記同等待,其實當日所有工作人員都係現役嘅空姐、空少,如果投考成功的話係有機會同佢地一齊做嘢,所以對當日工作人員嘅態度一定要好好。 千祈唔好俾任何人剝奪你過關嘅機會,就算對工作人員有禮貌唔一定有分加,但絕對唔會扣印象分。

  • 當日Jennifer喺waiting room等,絕對無玩電話,坐要端正,同埋要合埋腳坐,因為唔知有咩人會經過。
  • 一入到航空公司,即代表已經開始被評核,所以一定要注意自己一舉一動,幻想身邊至少有100部camera影住自己!
  • 當被嗌名時,就要提醒自己挺胸收腹同微笑,微笑係極度重要! 要時刻提醒自己要微笑、微笑同微笑。
  • 點解沿路行去interview room要keep住微笑? 以為無人會睇到你有冇笑? 事實就係真係有人睇到,因為考官就正正企喺房門外迎接你,全程係計緊分! 考官企喺到就係睇你嘅儀態,同埋行路時夠唔夠端正、望到人時有冇eye contact、見到其他人時會唔會點頭微笑。
  • 當行到考官面前要同佢握手打招呼,講一聲: 「Hello,你好,我係XX」,中英文都無問題。
  • 入到房仲有另一位考官,所以都要微笑同考官握手打招呼,同埋介紹自己,之後搵個位置輕輕擺低個手袋,再搵位坐低開始interview。
  • Interview基本上有廣東話同英文兩個部分,再加一個普通話環節,普通話環節唔同時段會有唔同考法。

→例子: Jennifer當時有一張看圖講故事嘅卡,係完全無字,要用1-2分鐘憑空想像去構思整個故事,再用普通話去講,原意係睇應徵者嘅普通話程度。唔需要講得好好,故事首尾唔呼應都無問題,講得差並唔會扣分,但要保持儀態端正、態度要正面、要微笑,故事唔好太黑暗,要令考官聽得明。

Jennifer分享考官曾經問過嘅問題:

  1. 英國係住宿舍、同其他人住,定係點呢?
  2. 喺英國會唔會自己煮飯呢?
  3. 最拿手嘅菜係咩呢?

*每個人嘅面試問題都係根據CV發問,所有應徵者被問嘅問題都唔一樣。

*除左簡單自我介紹同點解想做空姐之外,Jennifer所準備有關空姐嘅問題全部都無問到。原因應該係因為Jennifer剛畢業回港,並無其他工作經驗,另外因為喺英國讀書,所以問題主要圍繞著英國。

**注意: Jennifer嘅經歷係比較特別嘅例子,所以有興趣考空姐嘅各位係需要準備唔同嘅考試題目,如之前做過咩工作、有咩經驗,點解想做空姐、遇到乜乜情況時會點解決等。

完咗Final Interview之後當然係返屋企等消息,Jennifer大約等一個多星期就收到電話通知成功咗,聽到好消息時都要保持鎮定,同埋要拎定紙筆寫低注意事項、有咩要帶,同時都會同你講做body check嘅時間,body check無問題之後先可以開始做training。雖然有少部分人未能通過body check,但只要係健健康康,無乜特別的話都係會通過! 唔使過於擔心body check呢一關。

只要一通過body check,就可以正式開始training,踏上做空中飛人之路喇!

JenniFa簡介:90後香港女孩,白羊座,前空姐,也做過文員,不喜歡打工,新鮮事都想嘗試,現為爆紅Youtuber