健康開始差好耐無見家人 6大情況唔辭職唔得

職場

廣告

臨近年尾,唔少打工仔都會考慮、計劃、準備轉工,眼見荀工處處,都真係咪話唔心動。其實做人唔應該只向錢看,但如果你打工打到有多於以下三個的情況出現,可能你要認真諗諗佢。但,點都捱埋年尾拎埋花紅先呀!頂住呀!

1. 你覺得同工作結咗婚

份工就好似一個貼身情人一樣,24小時伴你左右。返工時佢肯肯定定存在,假設你有幸放工,佢都會以whatapps的形式來關心你,擔心你太得閒冇事做,驚你冇為明日返工做好準備。即使你屋企冇wifi、電話開埋飛行模式,佢都有機會進入你夢鄉,等你回味今日同佢嘅甜蜜時刻。

2. 冇見過家人或者朋友

你唔會再返到屋企食飯,有得食住家飯都係因為偉大的媽媽留飯畀你。朋友出去Happy friday,你就Happy working;當佢哋Up相上IG,你就Up緊份文件上公司個Drive。

瑞銀分析全球71個城市工作同報酬模式,香港每年工時跑贏全球,一年工作2,606個鐘,每星期工時平均過50個鐘。放工對你而言,就好似六合彩一樣,放唔到係常態,放到係你夠運。加班對你而言直情係工作範圍以內,加班係責任,唔加班即係你冇畀心機做好份工。

3. 未返工已經諗幾時會放工

你對份工嘅厭惡感就好似喺街邊見到一隻又大又醜嘅老鼠王一樣,真係唔想接觸佢囉。但為咗養自己、養屋企,你決定堅持。唉,工作佔你咁多時間,打份咁討厭嘅工,你開心咩?你高興咩?人生有幾多個十年呀,你走喇。

4. 在公司進化成萬能俠

你讀咗咁多年書,都係打算做返你嘅專業,點知公司就致力開發你另類潛能,畀機會你學習其他新技能。你明明係個設計人才,但公司就因為睇得起你嘅腦力,叫你做埋公司盤數;你明明係個爬格仔嘅文人,公司就驚你長期坐會對身體唔好,請你做埋送件,等你訓練身體。

5. 人工永遠同你工作量之間有鴻溝

你嘅工作量會隨日子增加,今日永遠比尋日多;但你嘅人工就好似港珠澳大橋一樣,唔係唔加,係加慢少少啫。

有機構調查報告顯示,預計香港明年平均加薪4.5%,扣除通脹後實質增長1.5%,屬亞洲區第三低。樂觀地諗,如果你份工加多過1.5%就真係要「巧開針」喇!咩話,你收到風唔會加?咁…小編都唔知講咩好喇。

6. 你嘅身體急速退化

長時間工作,冇運動;日日外賣,「嘩!盒飯全部都係致癌物,正!」,咁嘅修行方式,想身體差絕對冇難度。以為失咗身都可以保返住個心?少年,你太年輕喇!

職安局早前嘅調查顯示,約73%的人精神心理處於「亞健康」或疾患狀態,更有24%及26%分別有抑鬱及焦慮症狀。如果你份工令到你身心兩失,你會唔會考慮讓返份絕世筍工,益吓其他打工仔呀?