【寶豬趣聞】消毒藥水

【寶豬趣聞】消毒藥水

電話響起~
佢:「姑娘呀?問你少少嘢得唔得呀?」

我:「你好,請問咩事呢?」
佢:「我而家有個傷口大到好恐怖,我想問點處理好呀?」
我:「你不如嚟診所俾醫生處理呀?」
佢:「我打得電話嚟就梗係我唔想睇醫生啦,你可唔可以答我呢?」
你又孤寒得幾率真啊。
我:「喺電話度我哋唔會知道你個傷口係點樣啊,不過最簡單嘅做法就係你去消毒洗傷口先嘅」
佢唔耐煩:「用咩洗呀?」
我:「洗傷口嘅藥水啊,藥房有得買~一包包粉紅色嘅」
佢:「你講啲我屋企有嘅得唔得呀?我冇嘅唔通又專登去買啦喎?」
你屋企有咩呀?豉油?米酒?鹽?糖?廁所水?我又唔係你工人,點知你有啲咩~

我:「先生,你不如都係嚟診所啦」
佢:「你再講多一次,我就收線!」
好呀!
我急急講:「先生,你不如都係嚟診所啦」
佢:「我問你有咩可以搞個傷口呀?」
說好的收線呢,人與人之間的信任在哪?你欺騙我…

我:「我唔清楚你屋企有啲咩可以洗傷口,所以你最好都係過嚟俾醫生睇睇啦」
佢:「我屋企有紅藥水黃藥水眼藥水同咳藥水」
咳藥水係搞笑的嗎?
我:「紅藥水同黃藥水都可以嘅」
佢:「紅定黃呀?」
你喜歡啦。
佢:「喂?答我啦~紅定黃呀?」
我:「冇咁礙眼嘅就黃啦」
佢:「揀老公咩!問你紅定黃都諗咁耐,旨意你嚟真係死得人多」

嘟。

其實你打嚟問嘢,我都唔係老奉答你嘅…

延伸閱讀

電話響起。
我:「你好,乜乜診所」
佢:「喂?我係樓上阿陳太呀」
我:「係~陳太咩事呢?」
佢:「我想問醫生今日開到幾點呀?」
我:「七點呀」
佢:「收遲啲得唔得呀?」
你早啲嚟得唔得呀?

我:「唔得呀,醫生準時走㗎」
佢:「阿陳生佢食埋飯先落得嚟呀,即係我老公呀,我老公呀」
我知你嫁得出啦,乖呀陳太~
我:「而家先五點,慢慢食都得,七點前嚟到得㗎啦~」
佢:「我七點先開飯呀」
咁你想醫生等到你幾時?你今日係咪煮法國餐呀?你而家係咪放緊血整緊血鴨呀?

我:「一係開飯前嚟睇咗醫生先呀?」
佢:「唔得呀!」
我:「點解呢?」
佢:「我要陪阿陳生落嚟㗎嘛,我老公嚟㗎喎」
阿陳生需要受監護的嗎?

我:「咁…大個人~自己落嚟都得嘅」
佢:「你會唔會俾你老公自己去睇醫生呀?」
我:「我未嫁」
佢:「你會唔會俾你阿媽阿爸自己去睇醫生呀?」
我:「會呀」
佢:「啊!你個死女包呀!咁不孝嘅!我唔係你囉!」
咁你又問我?
我:「醫生準時七點走㗎啦~夾到時間就過嚟睇啦吓」
佢:「你嗌醫生等吓我得唔得呀?」
我:「你七點先開飯,醫生真係等唔到呢~唔係等你幾分鐘咁少嘛」

佢:「我洗埋碗嘅九點半啦!」
我:「佢屋企都有老婆仔女等佢開飯㗎~所以先要準時走啊」
佢:「食晏啲又唔會冇忽肉,等埋阿陳生啦,我老公呀」
我嚟返工㗎咋,因乜事搞到我好似嚟談判咁呀~
我:「咁你食晏啲咪得囉」
佢:「你都唔通氣嘅!做咩要我晏啲食啫!我煮好晒點晏啲食啫!我煮得好辛苦㗎!晏咗點食呀?」

嘟!
而家先5點,你7點先開飯,而家煮好晒?擺得嚟都差唔多臭啦,唔爭在啦阿陳太。

延伸閱讀 : 【寶豬趣聞】神奇女子

有日一位女士睇完醫生出完藥俾完錢。
佢企咗喺度,郁都唔郁。
我:「小姐?冇事嘛?」
佢冇回應,任何反應都冇,眼神望向遠方。

我:「小姐?小姐?係咪好唔舒服呀?不如你坐低抖抖,見好啲先走?」
佢仍然唔理我。
同事拍拍我膊頭,示意我入藥房。

入到去,我:「唔駛睇住佢呀?」
同事:「唔駛啦,由佢啦,佢次次都係咁」
我:「咁神奇?」
同事表示冇我嘅事,我就出返去。
小姐仍然好堅定咁企喺度。
我冇理就繼續做手上嘅文書嘢啦~
做呀做~突然好大聲嘅『呀!』
哇,頂你個制呀,嚇到我頭髮都豎起。
我:「小姐?咩事呀?」
佢終於有反應:「我張收據呢?」
我:「咪喺袋入面囉?假紙都係~」
佢望望我:「你知我諗乜咩?」
做咩突然跳制呀你~我講東,你講西嘅?
我:「er……………唔知」
佢:「你做咩同我講嘢?」

同事即刻捉住我膊頭拉我入藥房。
同事:「咪叫咗你唔好理佢囉」
我:「但係佢問我嘢喎」
同事:「佢唔係同你講嘢呀」
我:「吓………………..」
同事:「你唔好多事啦,唔好應佢呀」
我:「哦….」
我內心好想知好好奇好想知好好奇好想知好好奇…
又出返去,小姐望住我,我又望住佢,我好好奇好想知呀~
佢:「你係咪諗緊我?」
我冇出聲。
佢再講:「我天生係與別不同,我知你諗咩,你係咪諗緊我?」
我都係唔出聲。心入面諗緊『比~卡~蕉~~~』
佢:「你唔信呀?你試吓諗樣嘢」
我有諗我真係有諗。『比~卡~蕉~~~』
佢:「你諗緊我呢?」

死開啦,自戀狂。
我開口:「唔係,你估錯咗啦!」
佢:「呀!!」
同事又捉咗我走了。
對唔住啦,我以後唔搭嗲啦~對佢。

延伸閱讀 : 【寶豬趣聞】執返嚟嘅貓 有病都要盡力醫

自從養咗糯米雞之後,我就發覺原來戇居嘅人真係有好多。
好多人見糯米雞有病,就苦口心婆勸我『解脫』佢,話佢有病好辛苦,唔好咁自私留佢喺度,唔好影響埋自己生活質素,佢只不過係一隻貓,只不過係一隻執返嚟嘅貓,唔值得大灑金錢去醫去保健等等。
所謂嘅『解脫』,你哋講嘅出發點真係從貓上出發?

一個生命,解脫說得容易。
但佢真係想被解脫嗎?動物,如果佢哋想生存,佢哋就會努力食飯。如果佢哋想死,就會拒絕進食。根本唔需要我哋去猜想~

照顧固然係一件苦差,但係遇到嘅,就可以輕易放棄咩?人都會老,人都會需要被照顧,唔通每次遇到需要照顧嘅人都可以就咁放棄?或者將個波掉俾人?

當然都有人勸我將糯米雞交俾其他義工照顧。
義工都係普通人,每一個人都可以係義工,包括你。
義工並唔係萬能,並唔係特別得閒,亦唔係特別富有…
只係遇到需要求助嘅弱小,一個活生生嘅求助,佢哋唔忍心唔捨得,想幫得就幫。
如果你咁「好彩」喺街上遇到需要幫助嘅動物,情況容許下請伸手援手。我所指嘅伸出援手,唔係拎起你部電話影張相,之後離開再擺上FACEBOOK出個POST『有冇人可以幫手?』。 

至少都希望你可以留守現場睇住隻動物,直至幫到手嘅人嚟到先。
如果唔係,你走咗,動物又離開咗被發現嘅範圍,你嘅伸出援手就會變得亳無意義。

延伸閱讀 :【寶豬趣聞】亂收費

電話響起~
我:「你好,乜乜診所」
佢:「診所呀?你哋星期日開唔開㗎?」
我:「開啊,應診時間係10-7」
佢:「星期日都開,醫生好發錢寒㗎?」
你想我點答你?
我:「….」
佢:「你哋會唔會亂收費㗎?」

我:「唔會呀,就算要開特效藥要加錢都會講咗俾你知先。」
佢:「即係會亂收費啦」
吓?講明俾你知都叫亂收㗎?
我:「你可以選擇唔要嘅~我哋唔會迫你要特效藥」
佢:「我有得揀咩」

我:「可以唔要…」
佢:「咪係囉!咪即係迫我要囉!」
媽,我好亂呀。
我:「……」

佢:「你一個收費包晒唔得㗎咩?」
我:「如果包晒嘅話,個價就會高咗~咁有時有啲人未必需要特效藥嘛」
佢:「拉上補下囉,你咁亂收費,係人都知你發錢寒啦」
我:「好多謝小姐你嘅意見,我會話聲俾醫生知以作參考㗎啦」
佢:「你mark低我個名呀」
我:「咩事呢?」
佢:「我星期日會過嚟睇」

我:「我哋冇預約嘅,嚟到登記排隊就得㗎啦」
佢:「你真係好唔掂呀,呢樣又唔得嗰樣又唔得咁樣又唔得」
我:「….規矩嚟嘅」
佢:「By the way我要星期日過嚟睇,你平時收人幾多錢呢part我就唔理啦,你收我平啲就得㗎啦,我星期日過嚟,我唔係啲咩閒人,冇咁多時間同你講同你等,你明㗎啦,我叫乜乜乜,嗌我乜小姐is fine」

嘟。
fine…早抖啦你。