侍應售貨員速遞員文員 各自有工作的難處

當時我仲係讀緊書，覺得呢個廣告無乜問題，對日常生應該有好處。但自從我出嚟社會工作，做過好多唔同行業，侍應、售貨員、速遞員、文員…

每一個行業都聽過客戶，喺無理情況下講呢句說話。
我真係想講句：劉德華！今次真係被你累死！

相信大家都有同感，香港係一個「投訴之都」，亦有一個「將自己權利用到盡」嘅癖好。

大家一定遇過以下情況，有乘客一上車就投訴巴士司機延誤，累佢返工遲到。

司機一句塞埋去：「塞車嘛有乜辦法啊？」
乘客不甘示弱：「你咩態度啊而家？我話晒都顧客啊！」

最後，司機大佬將架巴士泊埋一邊，輕輕鬆鬆打電話返總部，話生命安全受到威脅，需要換下一個司機。

呢一刻，大家即時勸呢位乘客嘈少句，大家都係趕返工，總好過全車人陪佢一齊遲到。

「咁嘅服務態度，我一定投訴你啊！」
「你鍾意咪投訴囉！我個名掛咗喺車頭啦！」

司機大佬死都唔肯開車，仲熄埋引擎撓埋雙手。成架巴士乘客無奈地落車，等到下一班車嚟，因為上班時間，根本成架人已經塞滿晒人。

最後，巴士公司只好另外開一架後備車，全車人足足等咗半粒鐘，身水身汗上返巴士…

如果大家上youtube睇返劉德華嘅廣告，其實片中售貨員嘅態度並唔係太差，只係劉德華話「咁嘅服務態度唔夠！」

於是，廣告無形灌輸咗一種「我可以擁有更多權利」喺每一個人腦海中。

之前我話香港人擁有「將自己權利用到盡」嘅癖好，例如飛機座椅可以讓乘客放低椅背，但好多人完全唔理會後面嗰位乘客，一放就放到最低！

坐佢後面嗰位乘客，唔單止睇唔清楚椅背螢幕，食飛機餐唔可以烏低身食，仲全程飛機望住前面嗰個人嘅頭頂…

你可能會講：「咁係飛機設計問題，佢俾我放到咁低，我就放㗎啦～」

其實有冇諗過，呢個設計可能用於緊急狀況，例如有乘客不適，有老人家、行動不便嘅人用，雖然座椅設計容許畀你放咁低，但唔代表你一定要放到最盡，影響其他人…

工作上亦有唔少例子，有同事放假，我需要頂替佢工作，有客人打電話嚟查詢，我希望瞭解返成件事，或講一講e-mail係幾時send，我追查返來龍去脈。

點知客人一句「唔好浪費我時間，俾你同事手機號碼我，我直接打電話俾佢！」

試問有邊個放假仲想收到工作相關電話？其實只要簡單講幾句，我就可以幫到佢…擾攘一輪其實浪費更多時間。

客人一句：「放緊假就乜都唔理？！咩服務態度啊！」就cut咗我線，轉頭打俾老闆投訴…

其實好多時只要每人讓一步，唔好將自己客戶身份權利用到最盡，個世界就無咁多壓力，大家都會開心啲。