如果你係護士的男友或丈夫 真係要同你講句辛苦晒

我好想話俾大家知，如果你已經做咗護士嘅男朋友或者丈夫，想同你講：「辛苦晒！」

文：小咩的醫院生活日誌

如果你係幻想或者諗過要一個護士女友，然後自己就會響屋企，俾人呵護照顧愛錫，皇帝式享受呢⋯⋯

我依家就要叫醒你！

首先你要明白，做護士嘅，如果仲有團火，咁佢係一個使命多過一份工。一起身，跳落床就係返工，屋企人、自己嘢都可以放埋一邊先。咁你做佢身邊嘅人，你就預咗佢一返工就將你放埋一邊。

但係，你要記住，佢放工，其實好需要你。

因為佢返工係用耐性去照顧病人、忍耐蠻不講理嘅病人同家屬、

仲要用腦用眼去俾藥做護理、同埋同其他部門鬥智鬥力，

你都咪話唔攰。返到屋企，我哋嘅耐性心力都用得七七八八。我哋最需要係— 被照顧。

護士都係個人，都需要你嘅照顧同愛護。所以唔好指望佢會餵你食嘢，氹你訓覺，分分鐘你要氹番轉頭。

假如你唔好彩，變成一個病人，例如傷風感冒，你就更會知道，護士係點對自己。

我哋會叫你：「吓，流鼻涕？食粒panadol同prition, 飲多啲水啦！訓一覺就會好架喇！」

然後「啪」門去咗返工。

我哋唔到搞唔掂都唔睇醫生，因為自己心知醫生會睇到咩同俾咩藥。所以，你唔好諗住我哋會餵你食藥，坐響床邊同你冚被，我哋係會叫你去櫃頭第二個櫃筒自己攞藥食，然後叫你早啲去訓。

仲有，職業病，日日都對住血呀、屎呀、尿呀、痰呀、膿呀等等，好難免我哋無論食飯、傾閒計都會講起，但係我哋一路講到屎尿痰，一路食緊咖哩飯；又或者一路講到血肉模糊，一路說說笑笑。

嗱，講完，你仲覺得我哋係做得過女朋友同太太嘅話，咁只可以同你講聲：「辛苦晒！你真係偉大！」