想加人工 先搞清楚自己喺公司地位
廣告
職場係一個唔可以用常理去解讀嘅神奇地方，佢會一步步咁逼你放棄應有嘅邏輯思維，徹底衝擊由你出世起所建立嘅價值觀！
文：Purple弟弟
筆者以往都做過唔少工作，而每份工作一談到人工之際都必定有所得著，以下為少少總結：
1.做得好加人工/做咗先加人工
做得多、做得快、做得好，自然有朝一日俾上司見到，繼而升職加人工負責更多項目，係每位打工仔初入職場嘅諗法。而現實係，你先要負責更多項目，先會有升職加人工嘅機會，所以做得多、做得快、做得好可以話只係辛苦自己。
2.非專業工作，低層要清楚自己地位
重要同必要係兩個唔同嘅詞彙，你係重要，但唔係必要！你只係最前線嘅執行者，乜都係你做。但喺上司心目中，俾垃圾建議，令你工作更加繁複嘅胡說八道會高層成員比你重要一百倍！要令自己由「重要」變成「必要」係加人工嘅關鍵，只要你確定公司人手唔夠又請唔到人，請大膽地以死相逼，要求加薪；而一般人手充裕環境下，低層嘅你只係可有可無兼且隨時可被取代嘅機械人。
3.打工仔要團結
人工要保密係唔少打工仔都會守嘅信條，同同事做到朋友後，可以不妨交換情報，睇下做同一職位、同一工作嘅你哋薪酬有冇出現巨大落差。不過請確保對方唔係豬隊友，聽完後就入房同上司講「點解邊個邊個高人工過我」！交換人工情報係等你知道自身人工可調整嘅程度，方便你爭取返同同事接近嘅薪酬（談判過程要有技巧以及不會影響其他同事）。
最後都要提一提－－每年加幾百人工嘅你哋都唔好抱住謝主隆恩心態，你加嗰啲人工連通脹都追唔到啊！
