【寶豬趣聞】諗得嚟你籮柚爛啦

職場

廣告

有日,一位先生嚟到診所。

佢:「姑娘,你哋醫生係男定女呀?」
我:「男醫生嚟啊~」
佢:「男醫生呀…嗯…」
我:「要唔要同你登記睇醫生?」
佢:「你俾我諗諗」
我:「好呀~」
佢行埋去一邊坐低咗思考吓究竟睇定唔睇。
一思考就成十分鐘了。

佢又行埋嚟問:「你頭先係話男醫生呀?」
我冇老人痴呆:「係呀」
佢:「嘖」
你做咩『嘖』呀?男醫生有咩問題呀?你唔歡喜咪出去搵個第二個囉?實有間有女醫生㗎!
我:「有冇啲咩幫到你呀?」
佢:「我唔想要男醫生呀」
醫生夠想日日睇靚女,日日談笑風生春風起不知幾爽。
我:「咁你出去睇吓其他診所有冇女醫生啦~我呢度得一個醫生咋」

佢:「你俾我諗吓」
男醫生唔會喺你諗諗吓期間變成女醫生呀,就算變到,都會係女版鄭中基。你要嗎?
我要,我要打鑊佢。

佢又再行埋嚟。
我:「係咪睇醫生呀?」
佢:「我想俾人睇籮柚㗎~」
我:「男醫生咪啱囉」
佢:「唔怕尷尬咩?」
我:「醫生日日見唔少啦,仲邊有尷尬」
佢:「我尷尬呀~」
你搵女醫生睇就唔會尷尬啦喎?
我:「大家男人,你有佢又有,有咩好尷尬呀~你睇就登記啦」
佢:「你唔好迫我啦,你俾我諗吓先啦,你而家好似迫我賣春咁」

唔好諗啦,諗得嚟你籮柚爛啦…

延伸閱讀:【寶豬趣聞】我返 Part Time 遇到呢位大姑

【寶豬趣聞】諗得嚟你籮柚爛啦