月入$25,000 地盤師傅教我: 識女仔比工作重要

社會熱話

廣告

文:Purple弟弟

唔知大家對地盤佬嘅印象係點呢?有人可能會覺得佢哋好不修邊幅,仲會成日收工組團北上尋歡,而我可以同大家講,事實的確存在呢類人!但都有好多正氣凜然嘅地盤佬係充滿經歷同故事,做呢行最大得著,分分鐘就係從佢哋口中所總結出嘅人生錦囊。

華哥係我做地盤跟開嘅師傅,可能因為工作關係操得一身健碩身材,雖然40幾歲但依然「風韻猶存」,可惜仍然好似未有對象,有一日華哥一改平日粗獷口吻,語重心長咁同我講:

「我好想人生重嚟!」
果種唏虛感重到我接唔到落去…

「我一個月得果2萬人工,都只係啱啱好夠我供樓同日常洗費,真係儲果啲錢都係星期六日返兼職。」

我唔知點樣安慰華哥,雖然佢臉上不帶任何情緒,但我感覺到佢內心已經嚎啕大哭。

「你大過唔洗問都會買樓㗎啦!」
咁香港地男仔無樓又真係好難生存!
「應該都想嘅,但買唔買得起就另一回事!」

「華哥教精你,想買樓第一步你知唔知係咩?」

「冇父幹咪惟有努力做野搵多啲錢囉!」

「華哥家陣唔努力咩?我一個星期做足7日,結果?想買樓第一步係溝女啊死𡃁仔!啊叔我一個人供咗幾十年,無曬生活,供完最後都可能得一個人住,啊叔唔會跣你,俾心機啦!」

我聽完當下覺得呢啲咪叫有見地,以前老豆老母講果啲「讀好書就唔洗好似我地咁捱」、「最緊要唔好怕蝕底」通通都係對你人生毫無幫助嘅建議!識個女仔人都開心啲,樓又兩份供,總好過你一個人為咗層樓失去所有,華哥用佢自己嘅例子點醒咗我!

「華哥我走先啦,約咗女仔食飯!你宜家返屋企?」
「我落轉深圳。」

我笑而不語咁揮揮手,同華哥呢位啟蒙老師說了聲再見!

相關文章:讀咁多書人工得$13,000 每次聽到都想喊