點解香港人唔鍾意思考 因為所有腦力已經奉獻晒俾工作
到底點解總有一班人討厭政治，或不想理政治嘢呢？
先唔討論「政治同生活息息相關、政治好重要、唔理政治正港豬」乜乜乜…
好多人生理心理都唔想理，其實同點解鍾意買書，但買完返屋企唔睇，有時間反而狂掃FB、IG有關。
再講個親身例子，我寫一個故事，所花嘅心血同時間一定比起大家睇故嘅時間多。
但好多人都以「唔睇字」「唔理政治最緊要開心」呢種無知為樂。點解呢？就係因為呢班人個腦太正常！
無錯，佢哋個腦係正常運作！
人嘅大腦有種特性，會幫你自動選擇一啲比較輕鬆、比較開心嘅事情去做。
例如玩Facebook、接收娛樂資訊、睇好多即食圖或影片…
以上各種資訊，大腦只需要處於放鬆狀態就能夠解決，開心笑吓又一日。
但係睇字同關心政治，大腦一定要經過花時間思考、判斷、資訊過濾先得。
以上兩者作比較，大腦自然會選擇較輕鬆嘅一方去做。所以大家鍾意睇面書多過鍾意睇書。
直覺認為多Like就係正嘢，少Like就可以唔理。因為大家可以唔使用腦去判斷嘛。
可能你會話：「但係睇書學到多啲嘢喎～」
呢個亦關乎到「認知易用性」嘅問題，喺現代咁多種選擇嘅情況下，大家判斷一樣嘢有冇用之前，會先睇吓佢易唔易用。
例如Facebook同Tumblr，即使Tumblr功能比較多，每個page首頁又個人化。但因為Facebook比較易用，大家又更易睇到，於是大家就選擇Facebook。而Tumblr淪為睇咸嘢嘅平台。
又例如，環保大家都知係正確、應該做嘅事…
但因為嫌麻煩，大家都唔願意去做。
睇書亦一樣，即使睇書得著比較多，但因為太耗時費勁，我睇一幅圖只需幾秒就引到我笑。睇愛情金句已經勾起我共鳴，做乜要花幾粒鐘睇一本書呢？
而政治需要用力思考、好多判決力、少少哲學、又觸及到歷史、法律等等…
嘩咁多嘢，我做隻快樂港豬唔係開心得多咩？
點解香港人唔鍾意思考，唔係因為我哋懶或蠢…有好多統計都話香港人智商高過好多國家。
但我哋每日嘅精力、腦力、體力，全部都奉獻晒畀工作，已經無餘力去顧慮太多嘢…
延伸閱讀：
