的士司機職場事 下次真係唔好飲咁多酒
文: 白告（我的你的紅的）
凌晨兩點幾鐘，喺遊咗半個鐘車河之後喺尖沙咀上個客人去傲雲峰，金額唔大但已經好開心。
入咗屋苑大閘落客之後，竟然有人咁啱行出黎上車，有時TIMING嘅嘢就係咁啱。目的地廣華醫院，乘客憂心忡忡，十幾分鐘車程一閃而過，去到廣華醫院之後，主角出現。
喺救護車出入口前少少位置上車嘅係一個戴四方眼睛嘅中年人，頭髮中夾雜住嘅灰色已經唔係少數。POLO SHIRT牛仔褲藍色背囊，普通打工仔模樣，係眼神有啲呆滯。半夜離開醫院上的士，眼神渙散都可以理解嘅，上車話要去元朗，我要用力控制面部表情，同時提醒自己，人哋喺醫院出黎，唔好笑，唔好輕佻。
通常喺醫院上車嘅乘客我都會簡單問佢哋有無事，有啲已經為文記述。呢個乘客喺我問完佢之後，好似打咗針興奮劑咁，由渙散變得激烈。
「無事，我都唔知發生咩事。」
「唔知咩事？醫生CHECK唔到你有咩事呀？」
因為都載過唔少乘客患上原因不明嘅病，甚至有病徵但唔知咩病，故有此一問。
「唔係呀，我直情唔知點解會喺醫院。」背包客激動咁回答我。
佢咁講我就大約估到發生咩事，即刻輕鬆晒，抑壓良久嘅笑容重現我嘅面上：「你係咪飲醉酒訓咗喺街，俾人送咗入醫院呀？最後嘅記憶係幾點喺邊度？」我好似查案咁問佢。
「咪十二點幾喺街囉，飲完酒去搭小巴，跟住就喺醫院喇。」乘客講得好激動，但我只覺得搞笑。
「你好好彩啦，無穿無爛，又唔係女人，無咩大損傷嘅，」
我趁無咩車擰轉頭望多眼，確認佢無任何地方包紮住：「係喎，啲錢仲喺唔係身先？」
我多心問多一句，費事一陣無錢俾又係麻煩。
從拉鍊聲推斷，乘客真係即刻打開背囊檢查，良久，總算得到肯定嘅答案，令我鬆一口氣。
漫漫長路，乘客無幾耐又訓返覺。聽住佢源源不絕嘅鼻鼾聲，我覺得佢今次真係好彩，醉到昏迷入醫院都唔知，運氣稍為差啲嘅應該已被洗劫一空，甚至暈喺唔起眼嘅馬路，被汽車輾過，到時斷手斷腳定斷氣，全看運氣。
唔係個個飲咁大都無事，去飲時一定要確認自己嘅酒量，唔好為旁人帶來不必要嘅麻煩，除非你好似呢個乘客咁，為的士司機帶來收入，又另作別論。
