有幸同伴侶去旅行 您要好好珍惜呢段關係

有幸同伴侶去旅行 您要好好珍惜呢段關係

每次睇《Do姐去shopping》同《世界零距離》,都會幻想自己可以有如農夫同東方昇咁,同傻更更既翠如BB、高貴既Do姐或者可愛妹妹s暢遊一番,開開心心過幾日。

文章授權:逆行@電視汁撈飯

每次旅行都係考驗

但廿幾歲人真係唔應該有咁多幻想,其實每次旅行,都係一個考驗,一不留神就會演變成杜如風陪你走過烽火大地或者兩個小生去旅行,係四哥同曾江版。

如果岩岩個情人節你都搞到唔掂,奉勸你唔好越級挑戰。

「有無咁難咁辛苦呀…又吹水!」每次總有人質疑,你可以先看《分手說愛你》,祖明同Fiona過大海瀨到一鑊粥果段,你會明白由你決定去果秒開始,難題就會一湧而上…每一關都好難過……

首先,第一關關乎外圍環境因素—請假。喺香港生存,假期已經唔多,不同行業仲不定期地定期有peak season,一來要同其他同事爭假,或者俾老細質問點解你會有時間放假,攞AL有如犯下彌天大罪,遞紙俾呀姐果刻比投6號定7號更鬥爭,要同女友夾到個五日四夜東京溫泉之旅已經唔易,想參加英倫三島十天團應該要九星連珠食神歸位先做到,這時候她的一句「乜你份工咁困身架,想去個旅行都唔得…呀邊個都又同佢男….」

眼淚在心裏流,苦痛問君知否。

歷盡滄桑、千辛萬苦、受盡白眼請到假,難題又黎啦。

有如立法會財委會辯論

首先留守亞洲定衝出歐美,盡情揮霍與節衣縮食,都會有如立法會財委會辯論,研究三日三夜;搭咩airline、住airbnb定酒店,都會於whatsapp用2寸長既msg或者1分35秒的錄音分析,然後再於住近啲機場但貴啲,同離地鐵站遠啲但豪裝之間再浪費一個lunch time……

如果你打算表現男人既大方就下佢,好瀟咁拋低一句「我無所謂呀…」就可以解決問題,只可以話你有時可悲,多數無女,因為佢聽完只會一句「你乜都唔睇,得我check野!又唔睇真啲,你都無心去既!咁乜都無所謂囉!」

雖然你想答「都好喎」,但你唔敢。

到萬眾期待等到出發,平時抨擊你沒有預備節目、缺乏心思,到旅行更加嚴厲譴責你不好好計劃行程,世上最遙遠的距離不是你喜歡她而她不知道,而是你想優悠閒逛,她卻希望Running Man般瘋狂奔走,在香港已經為五斗米日夜勞碌的你,不能理解她不體諒只想放空的浪漫。

「9點都唔起身,嘥哂啲時間!去旅行仲屈喺酒店!」

你盼望阿里士多德仲在生,除左可以解釋點解「為生活要返工,但返工卻令我地無左生活」之外,仲有「放假明明可以瞓晏啲,但旅行搞到要早起」呢個悖論。

仲有一關 — 天意

俾你連出門時間都解決到,用堅毅同真誠戰勝所有分歧之後,仲有一關 — 天意。

每搭一程車、每去一個景點、每食一餐飯都係一場賭博,係一場無上限既賭博。

車可以塞到唔郁或者去到先知兜遠左,景點可以與預期差天共地,撞岩果日閂門或者突然豪雨,意粉黎到先知好咸,條大腸仲有舊屎,去過旅行你會學識咩係Murphy’s Law,「可以出錯的,也會出錯」。

福無重之,禍不單行,黑仔旅程仲可以包括delay、唔見野、跌爛野,同埋必經既當失路。

喺又凍又黑既街上,捱住肚餓,你可以體會到咩叫全球化,無論你喺東京、巴黎、米蘭定倫敦定士林,結果都係一樣 — 罵交或者佢罵你……

「都話早啲返去架啦!」

但基於男人既英雄主義,加上唔想嘥錢搭的士,你會堅持繼續搵路,但基本上行多過15分鐘已經開拖。

記得卓韻芝說過恨恨的迷失過,才能找到方向,但你卻深明恨恨的迷失過,才明白的士的漂亮。

愈攰愈易發脾氣

愈走愈攰,愈攰愈易發脾氣,愈攰愈易講錯野。

如果更不幸病倒,起不了床,吃不下東西,整天呆在房間休息,給了幾千至一萬來異國瞓酒店,個心仲赤過半年前買左樓。

去旅行本身已經係一場賭博,將你地既感情置於賭枱上,一輸可以將一段關係摧毀大半;但世界都係兩睇既,回頭細看,你可以看到她有多好。

怨你少假,其實是希望多和你離開這個是非之地,望記紛爭,與你日見夜見足幾日;

對任何事千揀萬揀,只希望不浪費一分一毫;

好好計劃行程,只為留下最美好的回憶;

唔夾但體諒係真愛

晨光第一線就起身,因為她知道4日3夜轉眼即逝;

遇上惡運,正正就是人生的寫照,貧窮、疾病在一生裏無可避免,

你卻因此有幸看到這個常常發脾氣的大小姐,在你病入膏肓時,會瞬間變溫柔,賢慧、醒左、叻左、俾心機左,連飯都突然識煮。

去旅行夾係好彩,唔夾但體諒係真愛。

有人話一對情侶去過旅行才能真正了解對方,我話如果你解決到以上分歧,你已經可以計劃婚期。

生活總有磨擦,過到就能笑到最後。

啲人成日問人拍拖拍成點,好簡單「我可以同佢去歐洲十日無鬧交,亦都無俾佢鬧」,滿分交卷。

過到旅行呢關一定係真愛,之後就算生老病死、只可以星期六日去轉長洲、過下大海,或者返深圳打個邊爐,相信都可以長長久久、白頭到老其實唔難。

延伸閱讀:

90後移民台灣 追夢人生的開始

拿住$12萬出走 移民台灣港人至愛

關鍵詞
伴侶旅行