職場眾生相 公司最多見高拜見低踩的人

職場

廣告

作為辦公室最低層嘅你,一定試過被客戶「玩弄」嘅情況。

「個客唔肯延遲交貨,一定要今個月內…」我將呢件事報告上司。

「搞錯啊?你有冇解釋畀佢聽點解我哋遲交貨?因為大陸工廠假期啊!」上司。

「我已經解釋咗,但個客話一定要準時交貨,交唔到貨就要我哋賠錢…」

上司打咗個電話去客戶公司,照樣講嘅我曾經同客講過嘅說話,然後收線。

「搞掂咗啦,你點做嘢㗎?」收線後,上司想借踩低我嚟抬高佢自己。

「但我同你講嘅說話一樣…」

「即係你解釋得唔清楚囉,呢啲要用說話技巧㗎嘛!」

我心諗,因為個客見你職位高,所以先肯啫…正當我咁諗,上司就補多句:

「你唔好以為我係高層,所以個客先肯啊!係我有能力說服個客,先會做到今日呢個位!」

我聽到呢句除咗作嘔之外,亦暗暗詛咒點解個客唔肯企硬!我上司一打電話去,就即時應承延遲貨期,咁即係明玩我呢類低級員工…

辦公室係一個最能夠體現階級制度嘅地方。呢樣係我踏足社會第一秒開始就發現到嘅事實。

其實我接受到上司指示下屬工作,每間公司都一定會有一個負責指揮嘅職位。

但我最接受唔到嘅,係工作過程中,客戶或其他合作嘅公司,都有呢種階級觀念。

當然啦,除咗你個上司,其實坐你隔籬個同事都一樣好想你死。見住你做錯嘢,唔幫你仲踩多你一腳。

現實根本無「同心協力,做好每一件事」呢支歌仔唱,就算明知你被老闆炒魷魚,升職加薪都唔會輪到佢,但見高拜見低踩,見到你死佢就最開心。

返工已經夠攰,仲要防範身邊嘅同事陷害就更加嘔血。工作係每個人無法逃避嘅現實,點解要將呢件事妖魔化?

以前小學雞,同學會舉手向老師告發你撩鼻屎、去廁所無洗手、偷偷哋講粗口…

原來無論幾多歲,人都一樣係咁幼稚。

作者為80後網絡作家,憑【我是技安,我出席了大雄的葬禮】網絡創作爆紅。
facebook專頁:https://www.facebook.com/BlueGodZi/

延伸閱讀:

當你工作累透了 想想支持你的家人就有動力

職場眾生相  公司最多見高拜見低踩的人