以為自己跑得快過車 小心睇路呀

職場

廣告

廣東道尖沙嘴段係一個頗為混亂嘅地方,黑的橫行,人車爭路,就個人而言係幾討厭嘅路段,但世事往往事與願違,愈唔想去嘅地方,就愈多機會去。既來之則安之,塞咗好耐終於落低乘客之後,就去前面唔遠嘅的士站,帶走一個被黑的揀客揀剩嘅可憐乘客。

文:白告(我的你的紅的

一如所料,乘客都係去附近嘅深水埗,路線簡單,左轉入北京道再一直行就OK。

駛出的士站時,一邊望住喺後方衝上黎嘅車,眼角餘光望到北京道兩邊企滿咗人,密密麻麻嘅人,而紅綠燈見到係綠色嘅。

就喺我想踩油嘅一刻,一個小朋友基於佢自己先明白嘅理由,喺一排排嘅腳之間穿出黎,我馬上踩剎車,時間已經無足夠理會後車會唔會太貼,會唔會撞埋黎。

小朋友幾乎過唔到聖誕

幸好車速唔高,乘客用手頂一頂副駕駛位嘅櫈背,已經穩住身形,我就稍微被安全帶勒一勒。

「無事?」我問一問乘客,同時望住被一個女人捉住嘅小朋友。

小朋友當然唔知自己幾乎過唔到聖誕,所以我將目光投向捉住佢嘅成年人,我以為會見到驚慌嘅目光,或者胡亂責怪司機嘅路人,但係無。

捉住個小朋友嘅女人雙眼聚焦喺手提電話上面,雖然捉住咗小朋友,但小朋友正竭力掙脫掌握。

我無點算到個女人身邊地下有幾多個購物袋,判斷到時機許可就開車,唔好堵塞道路。

「又係大陸人。」緩緩駛過路口後,乘客喃喃自語。

睇佢大唔大命

「呢條路係咁㗎,隨時都有短跑冠軍衝出黎。」

我將事實講比乘客知,乘客似乎都有車牌,一點就明:「我知呀,我都試過差啲撞到人,啲人都唔睇路嘅,撞到就真係睇佢大唔大命……」

之後我同乘客就各自分享幾乎撞到人嘅經歷,講極都講唔完咁。

好多人都覺得自己跑得快過車,血跡斑斑嘅路面肯定唔同意。

喺香港法例層面,司機係有責任確保,喺你控制住一部足以致命嘅機器時嘅安全,但同時每個駕駛者都知道,好多情況無論點小心,都唔一定咁好彩停得切,年關迫近,過馬路最好留意安全。